Iyo ugeze muri iri soko riherereye muri santere ya Mukamira ifatwa nk’Umujyi wa Nyabihu, abaricururizamo n’abarirema batangira kukubwira ibibazo bahuriramo nabyo,iyo imvura iguye.

Umwe mu bacururiza imboga ku bisima byo mu isoko rwagati utarashatse kwivuga yagize ati “Iyo imvura iguye amazi yinjira mu bisima ibintu bikangirika. Dore nk’imboga zibamo zarengewe n’amazi.”

Akomeza avuga ko iyo imvura iguye bari mu isoko hari abahitamo kwanura ibintu byabo bakareba aho babijyana, ibindi bikangizwa n’imvura.

Aya mazi ava mu gisenge no ku mireko ari menshi yanacukuye hasi ku bisima no mu isoko ku buryo ibice bimwe usanga bitose ahandi hari ibinogo by’amazi.

Iki kibazo cyanagarutsweho na Rubanandora Theoneste, ahagarariye abikorera mu murenge wa Mukamira.

Yagize ati “Ikibazo cyerekeranye n’isoko rya Mukamira, rwiyemezamirimo waryubatse, ntabwo yaryubatse neza ku buryo ubu risigaye riva. Abacuruzi iyo imvura iguye baranyagirwa.”

Yongeraho ko ikibazo giterwa n’uko isoko risakaye nabi,ku buryo iyo imvura iguye hari ibice byaryo biva,cyane cyane ahari ibisima bicururizwaho.

Iki kibazo kibangamiye abacuruzi n’abarema iri soko ngo bakaba barakimenyesheje ubuyobozi bw’Akarere babusaba ko bwagikemura.

Ku ruhande rw’ubuyobozi, Mukaminani Angela umuyobozi w’Akarere wungirije ushinzwe ubukungu avuga ko bazi iki kibazo bakizi.

Agira ati “Ubwo twaganiraga n’abacuruzi bose ba Mukamira barakitugaragarije. Twateganije amafaranga yo gusana inyubako nka ziriya. Siryo ryonyine,n’irya Kora ndetse na Gasiza hari ahakeneye kuvugururwa.”

Yongeyeho ko kuri ubu impuguke mu bwubatsi zasabwe kugaragaza ibikenewe ngo izi nyubako za Leta zitangire zisanwe.Iki gikorwa kikaba giteganijwe muri Mutarama 2016. Iri soko rikaba ryarubatswe mu mwaka wa 2008.

Safari Viateur