Umuryango uvutse vuba w’abagore bikorera (New Faces New Voices) wifuza ko abagore bawinjiramo ari benshi, bagatanga imigabane yabo kugira ngo bitangirize ikigo cy’imari.

Babivugiye mu nama yabahuje n’abandi bafatanyabikorwa kuri uwu wa kabiri taliki 10/11/2015.

Dusabe Thérèse, Visi Perezida wa mbere w’ihuriro Nyarwanda ry’abagore bikorera avuga ko kiriya kigo kizaza ari igisubizo ku bibazo by’abagore.

Agira ati"Tugiye gukangurira ba rwiyemezamirimo b’abagore bose ngo bitabire kwinjira muri uriya muryango bityo kiriya kigo kigiye gushyirwaho kigire ingufu, kizajye kireberera abadafite ubushobozi ndetse kibabere ingwate mu gihe bikenewe".

Dusabe akomeza avuga ko abagore bakora ubushabitsi (bizinesi) zo hejuru bakiri bake cyane ari yo mpamvu kiriya kigo cy’imali cyatekerejwe.

Dusabe ati"Abadamu benshi bikorera baracyagaragara mu mishinga yo gucuruza ku gataro kuko bageze kuri 80% mu gihe mu rwego rw’imishinga minini batageze no ku 10% by’abantu bose bari muri uru rwego".

Dr Nsanzabaganwa Monique ukuriye New Faces New Voices, avuga ko kiriya kigo kizaba cyujuje ibisabwa.

Agira ati" Kugeza ubu twamaze kubona icyangombwa cya RDB ariko tugomba no kubona ibitangwa n’ibindi bigo nka Banki nkuru y’u Rwanda ndetse n’ikigo cy’imari n’imigabane bityo dutangire twemye".

Yongeraho ko barimo kwiga uko imigabane izatangwa, uko hazakorwa igenzura ku buryo byose ngo bizakorwa mu mucyo kugira ngo hatazagira abanyamuryango bijujuta ngo ntibasobanukiwe imicungire y’umutungo wabo.

Umwe mu bitabiriye inama yavuze ko kiriya kigo cyari gikenewe kuko kizabarinda gusiragizwa n’amabanki yatumaga batakaza igihe cyo gukora akenshi nta n’icyo yabamariye.

Munyantore Jean Claude