KT TV
Aho u Rwanda rwarwanye hose rwaratsinze-Lt.Col Karegeya
Ku Munsi w’Intwari, abaturage b’i Kirehe bibukijwe ko u Rwanda rutajya rutsindwa basabwa guharanira iryo shema bitoza umuco wo gutsinda.
Ni mu muhango wizihijwe ku wa 01 Gashyantare 2016 mu Murenge wa Gahara ku rwego rw’Akarere ka Kirehe.
Lt Col Eugene Karegeya, Umukuru w’Ingabo mu turere twa Kirehe na Ngoma, mu kiganiro yatanze kuri uwo munsi yibanze ku rubyiruko nk’imbaraga z’igihugu cy’ejo hazaza.
Yabasabye kurangwa n’umutima ukomeye ,ubwitange, ubushishozi, ubwamamare mu butwari biturutse ku bikorwa bishimwa na benshi, kuba intangarugero, kurangwa n’ubupfura, umuco,ubumuntu, byose bigahuzwa n’umuco wo gukunda igihugu.
Ati “Rubyiruko ni mwe mbwira cyane, ababaye intwari bari urubyiryuko baharaniye gutsinda biba n’umurage ku Rwanda kuko ingamba zose rwarwanye ntirwigeze rutsindwa, iyo rwateye ruranesha byanze bikunze. Icyo tubatezeho ni uguharanira ubutwari no gutsinda nk’uko biri mu muco w’Abanyarwanda”.
Yasabye abaturage kwirinda icyo ari cyo cyose cyasubiza igihugu inyuma, agira ati “Igihugu cyarapfuye kirazuka, mugikorere mwirinda kugisubiza inyuma. Ni nde wari uzi ko u Rwanda rwakwakira CHAN? na CAN iraza ejo bundi kandi nimushyiramo ingufu zanyu zose n’igikombe cy’isi kizaza”.
Avuga ko u Rwanda ruri mu bihugu bitanu ku isi mu gutanga umutekano mu gihe rwabonwaga mu ishusho y’ubwicanyi. Ati “Ubu ugeze mu Rwanda ntiyifuza gutaha."
Umuturage, Kankwanzi Anastasie, avuga ko Umunsi w’Intwari ari ikimenyetso cyiza mu kwibutsa abaturage inshingano zabo.
Yagize ati“Ubu twishimye, ibiganiro duhawe biradukanguye kandi abana turabaha umurage wo gukora, gukunda igihugu nibiba na ngombwa banacyitangire.
Zikama Eric, Umuyobozi w’Inzibacyuho w’Akarere ka Kirehe, asaba abaturage guharanira ubutwari babumbatira amahoro igihugu cyagezeho bakunda igihugu.
Yagize ati “Niba uri umuhinzi hinga neza, niba uri umuyobozi haranira ukuri urwanye akarengane uzaba uharanira ubutwari”.
Ibitekerezo ( 2 )
Ohereza igitekerezo
|
|
muraho abanyafurika tureba intwari kubantu barwana na bene wabo bagirango babone ubutegetsi bazabukurwaho kungufu ubatsinze nawe akagira intwari ze kuki ubutwari tuburebera muntambara ? tutarebera ub utwari mugukora ibindi byiza bizamura ibihugu byacu aho kuvuga ngo afande nintwari kuko azi kurwana nabene wabo ahubwo tukavugango umuturage kanaka nintwari kuko yarwanyije umwanda mugukora isabune iguramake kuburyo ntawayibura abarimu bose nintwari kuko nabo twita intwari ubu babukuye kwa mwarimu
u Rwanda ruratera ntiruterwa, dukomeze ubwo butwari ntawe uteze kuzadukora mu jisho