Kuri uyu wa gatatu tariki 4 Ugushyingo 2015, nibwo yabibasabye mu biganiro yagiranye n’abayobozi kuva ku rwego rw’umudugudu barebera hamwe uko barushaho kwiteza imbere.

Yagize ati “Banza witokore, uze gutokora undi. Bivuga ngo icyo ujya kwigisha bariya baturage barakurora, banza ugikore kuko ntuzajya kubwira abaturage ngo nimugire isuku wowe karabaye.

Ntuzajya kubwira abaturage ngo mwirarana n’amatungo abana bawe bararana n’ibyana by’ingurube. Kuyobora rero haricyo bisaba, birasaba kwitanga, bigasaba kuba icyitegererezo kubo uyobora.”

Minisitiri Kaboneka avuga ko mu gihe abayobozi bazaba intangarugero kubo bayobora nta kabuza ko nabo bazashaka gutera ikirenge mu cy’abayobozi babo, kuko bazaba barimo gutanga urugero rwiza.

Umuyobozi w’Akarere ka Gakenke Nzamwita Deogratias, asobanura ko impanuro bahawe na Minisitiri bagiye kuzigenderaho, kuko hari byinshi zishobora gutuma bihinduka hakabaho n’impinduka mu mikorere yarisanzwe.

Ati “Impanuro minisitiri yaduhaye iya mbere nuko abayobozi tugomba kuba intangarugero kugirango abaturage bakore ibyo twaberetse ariko natwe bakabona ko twabaye intangarugero.

Icya kabiri n’imikoranire myiza irimo gukorana ubwuzuzanye hagamijwe kugirango abantu bagere ku musaruro, nkaba numva ari impanuro turi buze kugenderaho kandi ziribuze gutuma hari byinshi bihinduka.”

Nyirambarushomana Agrippine n’umukuru w’Umudugudu wa Gishyinguro mu murenge wa Gakenke, avuga ko nyuma y’ibiganiro na Minisitiri batahanye ingamba zo gushishikariza abaturage guhindura imyumvire n’imikorere kugira ngo bagere kw’iterambere.

Ati “ku giti cyanjye ngomba kuba intangarugero, nkaba bandebereho muri gahunda zose za leta kandi nkazubahiriza nibura 100%.”

Abdul Tarib