Ntakirutimana yabisobanuye agira ati: "igihugu cy’u Rwanda kizazamurwa n’Abanyarwanda ubwabo, nta munyamahanga uzatwubakira igihugu. Abanyamahanga akenshi bafasha uwifashije kandi akenshi bakunze gushyira mu bikorwa wa mugani, Abanyarwanda bakunda kuvuga bati: ‘Usenya urwe umutiza umuhoro".

Ibi uyu muyobozi w’Akarere ka Gakenke yabibwiye abitabiriye umuganda ahanini bagizwe n’urubyiruko wabaye kuri uyu wa gatatu tariki 20/02/2013 mu Murenge wa Rushashi.

Umuganda wibanze ku gutunganya ikibuga cy’umupira w’amaguru, gusibura uduferegi turi impande zacyo tubuza amazi kwinjiramo ndetse no gukora umuhanda uganayo. Uyu muganda wakozwe uri mu mihigo y’inama y’urubyiruko ku rwego rw’akarere.

Ngo uretse no gukora umuganda, urubyiruko rugomba kwitabira gahunda zitandukanye za Leta kuko ari zo mbaraga z’igihugu n’abayobozi b’igihe kiri imbere; nk’uko Umuhuzabikorwa w’Inama y’Urubyiruko mu Karere ka Gakenke, Yamugeneye Ildephonse abitangaza.

Urubyiruko rworoje inka umubyeyi wacitse ku icumu wita Nyiransengimana Francoise. Iyi nka yakomotse mu mafaranga agera ku bihumbi 150 yakusanyijwe mu rubyiruko rw’akarere maze agurwa inka.

Mu ijwi ryuje ibyishimo, Nyiransengimana yashimiye urubyiruko rwamuhaye inka, avuga ko izamugirira akamaro akabasha kubona amata n’ifumbire ndetse n’ubwisungane magirirane mu kwivuza buzwi nka mitiweli.

Urubyiruko rwanakanguriwe kureka ibiyobyabwenge birimo kanyanga, inzoga z’inkorano n’urumogi kubera ingaruka mbi bigira ku buzima bwabo, rukitabira gukora rugatera imbere ku buryo bwihuse.

Nshimiyimana Leonard