Abakuye mu Rwanda abenshi bajya gushyingirwa ku ngufu abandi bagakoreshwa imirimo y’uburetwa ibaviramo kwicwa, nk’uko Tony Kuramba, umuyobozi wungirije w’urwego rwa Polisi rushinzwe iperereza (CID) yabitangaje kuri uyu wa gatatu tariki 8/10/2014.

Aba ni bamwe mu bakobwa Polisi yigeze gufata bashaka kujya mu Bushinwa baciye muri Uganda.

Yagize ati “Hari Tanzania, za Zambia ndetse na za Malawi akenshi bajya kubashyingira ku ngufu, hari ibindi bihugu byo muri Aziya nk’u Bushinwa tumaze kumenya ko hariyo abana b’Abanyarwanda, Dubai bariyo ibindi bihugu nka za Malayisia na za Thailand naho dufite amakuru ko ari inzira aho bagana.

“Icyo bajya gukoreshwa hari uburaya, gukoreshwa imirimo y’ingufu, biranashoboka ko hari abicwa bagakurwamo ingingo z’umubiri kuko ibi ni ibintu bizwi mu gucuruza abantu.”

Iki kibazo cyahagurukije inzego kireba ziyobowe n’inteko zikaba ziri gutegura inama yo kwiga uburyo cyaradurwa mu Rwanda.

Mu bagerageza gukora ibyo byaha byo gucuruza abantu baba ababakura mu Rwanda cyangwa ababajyana hari abagera ku 10 bafashwe bashyikirizwa inkiko, aho babiri muri bob amaze guhamwa n’icyaha bagakatirwa naho abandi bakaba bakiburana.

Abakobwa bo mu Rwanda bakomeje kuvugwaho kugira uruhare muri iri curuzwa ryabo, kuko hari ababikora nk’uburaya. Ariko Minisitiri w’Umuryango, Oda Gasinzigwa, akemeza ko abo bari bakwiye kwirinda ubwo buraya kuko aribwo bukurura ibyo byose.

Ati “Twumve y’uko n’ubwo buraya niyo yaba yigurisha biba ari intangiriro yo gutuma na wa wundi ushobora kumugurisha bimworohera, kuko urwo rubyiruko rwamaze kugera aho rwagiye kwicuruza cyangwa no kuba bakora ubwo buraya tuba dutanze icyuho kuri wa w’undi uri bubashe kumubeshya.”

Abahoze bakora uburaya nabo bakabona batakigezweho baratungwa agatoki kuba ku isonga ryo kurarura abana b’abakobwa cyane cyane abakiri bato. Polisi ikaba yasabwe guhozaho ijisho ariko nayo isaba abaturage gukorana nayo bakajya bayiha amakuru.

Leta yashyizeho itegeko rihana bene ibi byaha ku bantu bakora ubu bucuruzi, ariko ntibikuraho ko hari ingaruka zikomeye uwakorewe icuruzwa ahura nazo kabone niyo yabivamo. Muri byo harimo kuba bagaruka barwaye indwara zibokama, guhahamuka burundu no guhezwa n’ababo.

iyo niyo mpamvu kuri uyu wa Gatanu uza hateganyijwe inama izahuza inzego zose zirebwa n’iki kibazo zirimo inteko ishinga amategeko, Polisi y’igihugu, Minisiteri y’Umuryango (MIGEPROF), Minisiteri y’Ubutabera (MINIJUST) n’urwego rushinzwe gukurikirana ihame ry’uburinganire (GMO). Iyi nama izaba iganira ku buryo iki kibazo cyarandurwa burundu mu Rwanda.

Emmanuel N. Hitimana