Kuri iyi nshuro, umuhango wo kwibuka wabereye mu nkambi ya Gihembe mu karere ka Gicumbi ukaba wabimburiwe n’urugendo rwo kwibuka rwazengurutse inkambi bafite ibyapa bisaba kurengenurwa no gushikirwa ubutabera, bifuza no gutaha iwabo.

Insanganyamatsiko y’uyu munsi ikaba yagiraga iti “Twibuke ubwicanyi ndengakamere bwakorewe Abatutsi b’Abanyekongo twunga ubumwe, duharanira ubutabera n’uburenganzira ku gihugu cyacu”.

Umutesi Victoire, umuyobozi wungirije w’inkambi ya Gihembe yibanze ku bwicanyi butandukanye bwakorewe Abatutsi b’Abanyekongo haba muri Kongo nyirizana no mu Rwanda aho yagaragaje ko abantu bishwe kinyamaswa bicwa nabo babanaga, gusa akaba yashimye abagerageje kubarokora babashakira icyizere cy’ejo hazaza.

Umutesi Victoire, umuyobozi wungirije w’inkambi ya Gihembe.

Yagize ati “Ndasaba umuryango mpuzamahanga n’imiryango itandukanye iharanira uburenganzira bwa muntu ko yakurikirana abakoze ubu bwicanyi bakidegambya hirya no hino amahanga arebera, mbonereho gusaba Leta y’u Rwanda kudufasha kubaka urwibutso rw’abaguye Mudende”.

Yanasabye amahanga ko yabafasha kugarura amahoro muri Kongo bityo bagasubira mu gihugu cyababyaye bagafatanya n’abandi ku cyubaka.

Umwe mu basirikare bagiye gutabara Abatutsi biciwe i Mudende yibajije impamvu umuntu yica undi, ataramuhaye ubuzima atariwe Mana yamuremye. Yagize ati “kubaho kwanyu si impanuka, ndabasaba kwiyakira mu buzima murimo nubwo muri mu buzima mutakagombye kubamo. Mwibuke mwiyubaka”.

Umuyobozi ushinzwe ibikorwa byo kwibuka mu nkambi ya Gihembe, Ndahiriwe Innocent, kimwe na bagenzi be batandukanye yagarutse ku bwicanyi ndengakamere bwakorewe Abatutsi b’abanyekongo bazize uko baremwe, aho yanavuze ko ubu bwicanyi bugikomeza muri Kongo muri Kivu, akaba yasabye amahanga guhagurukira gushaka umuti w’ikibazo.

Bahuriye hamwe batanga ubuhamya bw’ibyababayeho.

Ndahiriwe yavuze ko kugeza ubu bataramenya neza imibare y’abapfuye gusa yavuze ko ubu hari gukorwa ubushakashatsi akaba yanasabye abantu bose bafite amakuru y’uko ubwicanyi bwakozwe yayatanga.

Umuyobozi ushinzwe urubyiruko n’umuco mu karere ka Gicumbi, Rwirangira Diodore, wari uhagarariye umuyobozi w’akarere yashimye ko yasanze icyo gikorwa cyo kwibuka cyitabirwa n’urubyiruko, akaba yavuze ko bitanga icyizere cy’ejo hazaza.

Yagize ati: “umuryango utibuka urazima, kwibuka ni karemano ahubwo kutibuka ni ikibazo kuko kwibuka bigamije gutuma abantu basubiza amaso inyuma bakareba aho bavuye bagatekereza n’impamvu muri hano bityo mugashaka ingamba z’uburyo byakemuka.

Kwibuka ni umwanya wo gufata ingamba kugira ngo ubwicanyi nkubwo butazongera, kwibuka ni ugutekereza kubasizwe iheru heru n’izo ntambara (imfubyi, abapfakazi), uyu mwanya ni uwo kubafata mu mugongo, kubegera”.

Bamwe mu bitabiriye urugendo rwo kwibuka Abanyamurenge bishwe.

Yakomeje avuga ko ubu bwicanyi bwakorewe Abatutsi b’abanyekongo bufite aho buhuriye na Jenoside yabereye mu Rwanda, bwari bugamije gutsemba Umututsi binyuze mu ngengabitekerezo yari yarakwirakwijwe hirya no hino.

Uyu muyobizi yavuze ko u Rwanda ruzakomeza kubaba hafi rubafasha kwiga uburyo abishwe bashyingurwa mu cyubahiro ndetse no gusaba ubutabera kubakoze ibi byaha ndengakamere, bakabiryozwa cyane ko u Rwanda ubu rwahagurukiye gushaka umutekano w’akarere no guca umuco wo kudahana.

Yasoje ashima izi mpunzi uburyo bibuka biyubaka, akaba yarabasabye kugira umujinya mwiza no gusoza ikivi bari baratangiye no kudaheranywa n’agahinda.

Ernestine Musanabera