Inzererezi ziganjemo ibirara byo mu mujyi wa Kibungo usanga mu masaha ya saa munani badatinya kwikira urusimbi muri ayo mazu ndetse ari nako abantu bahita hafi yaho.

Muri aka gace hamaze iminsi havugwa ubujura ku iduka ryuwo bakunda kwita Mukonyine ucururizaga mu nsi y’aya mazu y’isoko bamennye iduka rye maze bamwiba imyenda n’amasafuriya yacuruzaga.

Abatuye umudugudu w’Amarembo aherereyemo iri soko ryubakwa, bavuga ko inzererezi zibarembeje kuko uretse no kubiba babateza umutekano muke barwana ubwo baba bari mu kabari kazwi nko “Mukamazimfura” cyangwa muri “Mukubitumwice”.

Umuyobozi w’akagali ka Cyasemakamba, Baganizi Frederic, avuga ko izo nzererezi bazifata zikajyanwa mu bigo ngororamuco abakuru bagafungwa gusa ngo zihora ziza nubwo ubuyobozi bukomeza gufatanya n’inzego z’umutekano mu kuzihashya.

Yagize ati “Nibyo birashoboka ko baba bahakorera ibyo bikorwa ariko nk’ubuyobozi duhora twubirwanya. Nta we urafatwa kuko iyo babonye umuyobozi bari kurukina bahita biruka. Mu guhashya ibikorwa by’ubuzererezi dukora imikwabu tugafata izo nzererezi tukazijyana mu bigo ngororamuco.”

Uretse kuba hakinirwa urusimbi abaturage bavuga ko aho hantu hashobora kuba banywera n’ibiyobyabwenge. Basaba ubuyobozi gukurikirana ikibazo cy’isoko rituzura kuko ngo babona ariryo ntandaro.

Ikindi basaba ubuyobozi ngo ni ugukurikirana akabari kitwa Mukubitumwice gaherereye munsi y’iri soko kuko ngo kaberamo umutekano muke.

Jean Claude Gakwaya