KT TV
Musanze: Ibyaha byinshi ngo bikorwa bikomoka ku ikoreshwa ry’ibiyobyabwenge
Ushinzwe ubugenzacyaha mu karere ka Musanze arasaba urubyiruko kwirinda ibiyobyabwenge kuko bigira uruhare runini mu kubicira ejo heza, ndetse ngo bikanabashora mu byaha bitandukanya bihanwa n’amategeko.
Mu gikorwa cy’ubukangurambaga bugamije kurwanya ikoreshwa ry’ibiyobyabwenge ndetse n’inda zitateguwe mu karere ka Musanze, IP Mucyurabuhoro Clement, yabwiye urubyiruko rwiganjemo urwiga mu mashuri yisumbuye mu karere ka Musanze ko ikoreshwa ry’ibiyobyabwenge rigenda rifata indi ntera, kuko n’abiga muri iki cyiciro basigaye bishora mu ikoreshwa ryabyo.
Depite Uwilingiyimana Philbert nawe wari witabiriye icyo gikorwa cyabaye tariki 12/10/2013, yibukije uru rubyiruko ko nta terambere igihugu cyageraho, urubyiruko rwishora mu biyobyabwenge, aho yavuze ko hari n’abiga muri za kaminuza bagaragaye mu ikoreshwa ryabyo.
Inama y’igihugu y’urubyiruko, yateguye ubukangurambaga bugamije kurwanya ibiyobyabwenge ndetse no gukanguria abana b’abakobwa kwirinda inda zitateganyijwe, ku bufatanye n’abandi bafatanyabikorwa ngo iki bazakigeraho.
Ubushakashatsi bwerekanye ko muri Musanze, abanyeshuri batararenga umwaka wa gatatu w’amashuri yisumbuye bagera kuri 15 batwaye inda zindaro mu mwaka wa 2012, naho abagera kuri 41 bakaba baroherejwe Iwawa, kubera ko bari baragizwe imbata n’ikoreshwa ry’ibiyobyabwenge.
Jean Noel Mugabo
Ibitekerezo
Ohereza igitekerezo
|
|
