Uyu mugabo w’imyaka 36 ukomoka mu Kagali ka Mucaca, Umurenge wa Nemba ho mu Karere ka Gakenke yari asanzwe ari ku rutonde rw’abantu bahigwa bukware n’inzego z’umutekano kubera ibikorwa bibi bitandukanye yari azwiho ko akora.

Mu nama y’umutekano yaguye yateranye tariki 30/10/2013, abayobozi batandukanye bamaze igihe kitari gito bamwigaho kubera uburyo ahungabanya umutekano. Hari amakuru yemezwa n’abasore bakorana ibikorwa by’ubujura mu mirenge itandukanye bari mu maboko ya polisi, avuga ko yari afite abajura bamuhagarariye mu mirenge, we akaba umuyobozi wabo.

Bapfaguheka ari mu maboko ya Polisi.

Ngo bakusanyije amafaranga bamugurira moto yagendagaho nubwo afite ubumuga bwo kugira ukuguru kumwe kugira ngo abashe guhuza ibikorwa by’ubujura neza. Mu kiganiro gito yagiranye na Kigali Today, Bapfaguheka yirinze kugira icyo avuga kuri ayo makuru.

Abajijwe niba hari abo bakorana ubujura, n’uburakari bwinshi, Bapfaguheka yasubije umunyamakuru wa Kigali Today agira ati: “ Oya ibyo urikubwira utara amakuru ntabwo ndabikubwira si ko bimeze.”

Ku mugoroba wo kuri uyu wa gatatu yafatiwe mu Gasentere ka Gakenke kubera moto ye idafite ibyangombwa kandi akanayitwara nta ruhusa afite, ariko mu gitondo cyo kuri uyu wa Kane tariki 31/10/2013, mu rugo iwe hafatirwa irobo ry’urumogi none ubu afungiye kuri Sitasiyo ya Polisi ya Gakenke.

“Njye nari mfite agatabi nari naraguriye inka yanjye bitewe n’uko yari irwaye baza kurisanga mu rugo mbese baravuga ngo ndarinywa kandi ntarinywa.” Uko ni ko Bapfaguheka abivuga.

Uretse ubujura n’ibiyobyabwenge, uyu Heka yari asanzwe azwi mu bikorwa by’urugomo n’urusimbi.

Ubwo Bapfaguheka yinikaga Uwizeyimana mu mugezi.

Mu mpera z’ukwezi kwa Nzeri uyu mwaka, yafashe umukobwa ukora uburaya amujyanya mu mugezi maze aramwinikamo, arajandama amazi arayanwa andi yuzuma mu matwi amushinja ko yamwibye terefone ngendanwa ye kuko bari biriranwe basangira. Ibi byabaga abaturage barebera batinya no kwegera ngo yabamerera nabi.

Yatawe kandi muri yombi muri Gashyantare nabwo uyu mwaka azira gucuza abantu utwabo akoresheje umukino uzwi nka “kazungunarara” ariko aza kurekurwa.

Ingingo ya 594 y’igitabo cy’amategeho ahana y’u Rwanda giteganya igihano cy’igifungo kuva ku mwaka umwe kugeza ku myaka itatu n’ihazabu ry’igihumbi 50 kugeza ku bihumbi 500 ku muntu wese ukoresha ibiyobyabwenge mu buryo butandukanye.

Igika cya kabiri cy’iyo ngingo giteganya igihano kuva ku myaka itatu kugeza ku myaka itanu n’ihazabu ry’amafaranga kuva ku bihumbi 500 kugeza kuri miliyoni eshanu ku muntu ufashwe yinjiza mu gihugu ibiyabyabwenge.

Nshimiyimana Leonard