Mu gihe imvura yari itangiye kugwa mu masaha ya saa kumi n’ebyiri z’umugoroba, abagabo babiri bakubiswe n’inkuba bombi bavuye kwahira ubwatsi bw’inka umwe agwa igihumura undi ahita apfa.

Habineza Jean Baptiste uyobora umurenge wa Ntyazo yatangaje ko Nyakwigendera yakubiswe n’inkuba ubwo yari mu nzira arimo yigendera avuye gushaka ubwatsi bw’inka yoroye ngo akaba ayari kumwe n’undi muntu we washoboye kurokoka.

Yagize ati: “Amakuru dufite ni uko Nyakwigedenra atigeze yugama munsi y’igiti nibura ngo inkuba abe ariho yamusanze dore ko akenshi ikunze gukubita abantu bagamye munsi yacyo”.

Agendeye muri ibi bihe turimo by’imvura umuyobozi w’Umurenge wa Ntyazo yongeye kwibutsa abaturage ko batagomba gukomeza kugama ahantu hatuma bahatakariza ubuzima.

Uyu muyobozi w’umurenge wa Ntyazo yanaboneyeho kwihanganisha umuryango wa Nyakwigedera wose muri rusange.

Inkuba ni uruhurirane rw’ingufu zihurira mu kirere maze ikubitana ryazo rigatanga izindi ngufu zo mu bwoko bw’amashanyarazi bikaba aribyo twumva cyangwa tubona bikubita nk’inkuba n’imirabyo. Ibyo ngo nibyo bikomeretsa cyangwa bikica uwo bihuye nawe.

Jean Pierre Twizeyeyezu