Nk’uko Ukunzuwe Epiphanie, umunyamabanga nshingwabikorwa w’akagari ka Mutiwingoma yabitangaje, ngo uyu Bucyanayandi yabanje gutongana na nyina abaturage baza kubakiza, batashye arabakurikira, Benimana nk’umukuru w’umudugudu amubajije impamvu ahungabanya umutekano niko guhita amukubita umuhini mu mutwe.

Umurambo wa Benimana ugiye gushyingurwa.

Ati “Bucyanayandi Pierre yatonganye n’umubyeyi we mu rugo, abaturanyi baza kubakiza birarangira mama we ava mu rugo n’abandi barataha, nyuma Bucyanayandi aza kuzamuka akurikiye abakikije mama we. Akigera ku muhanda ahura na Benimana avuye ku rugendo niko kumubaza ati bite ko uri kwisararanga, uzajya uhora urwana buri munsi? Undi nta bindi byinshi bavuganye yahise amukubita ikintu mu mutwe undi agwa aho ngaho”.

Ukunzuwe akomeza avuga ko abaturage bahise bata Bucyanayandi muri yombi agashyikirizwa inzego z’umutekano, naho Benimana akajyanwa ku kigo nderabuzima cya Ngara cyahise kimwohereza ku bitaro bya Kigeme, nabyo bikaza kumwohereza ku bitaro bikuru bya kaminuza bya Butare (CHUB) kuwa gatandatu mu masaha ya saa kumi n’igice z’umugoroba ari naho yaguye kuri uyu wa mbere.

Umuyobozi w’akarere ka Nyamagabe, Mugisha Philbert yihanganishije umuryango wa Benimana.

Ubwo nyakwigendera Benimana yashyingurwaga kuri uyu wa kabiri tariki 13/08/2013, Ubuyobozi bw’akarere ka Nyamagabe, ubw’umurenge wa Mbazi ndetse n’inzego z’umutekano bifatanyije n’umuryango wagize ibyago bawusaba kwihangana.

Umuyobozi w’akarere ka Nyamagabe, Mugisha Philbert yibukije abaturage ko bafite inshingano yo gutabarana no gukumira ikibi, ndetse bakaba bagomba kwigisha no kugorora abagaragaza imico itari myiza mu miryango yabo, aho kumva ko abantu bazagororerwa muri gereza.

Abaturage baje gufata mu mugongo umuryango wa Benimana.

Yabasabye kandi gukumira no gukemura amakimbirane mu miryango kuko ahanini ariyo atera umutekano muke rimwe na rimwe agahitana abantu, dore ko Benimana yaguye mu makimbirane Bucyanayandi yari yagiranye na Nyina.

Benimana yari amaze igihe kitagera ku kwezi abaye umukuru w’umudugudu wa Muduha ndetse akaba yari n’umujyanama w’ubuzima, akaba asize umugore bari bamaranye imyaka 14 n’abana bane, aho umukuru yiga mu mwaka wa gatandatu w’amashuri abanza.

Ubuyobozi bw’akarere bwiyemeje kuzaba hafi y’umuryango wa Nyakwigendera Benimana.

Emmanuel Nshimiyimana