Gasore Clement, umuyobozi w’umurenge wa Muyira urwo rugomo rwabereyemo avugana na Kigalitoday mu gitondo tariki 02/07/2013 yavuze ko Mbarushimana Shaban yashyikirijwe poste ya polisi iri muri uwo murenge kugira ngo ashobore gukurikiranwaho icyo cyaha.

Uyu muyobozi yakomeje avuga uwatemwe ariwe Habiyambere François yahise ajyanwa kuvurirwa mu kigo Nderabuzima cya Nyamure kiri muri uwo murenge wa Muyira.

Andi makuru twashoboye kumenya kuri Mbarushimana Shaban watemye urutoki rukavaho mugenzi we ashimangirwa n’ubuyobozi bw’umurenge wa Muyira avuga ko uwo mugabo yari asanzwe ku rutonde rw’abantu bakekwaho kunywa ibiyobyabwenge ndetse bakanitwara nabi mu bandi muri uwo murenge.

Iby’iyo myitwarire ye bivugwa ko itari myiza isobanurwa n‘umuyobozi w’umurenge wa Muyira Gasore Clement agira ati: “Uriya mugabo wakoze bene ruriya rugomo yari ku rutonde rw’abantu bashyirwa mu majwi n’abaturage ko banywa ibiyobyabwenge ariko hari hagikenewe ibimenyetso byashingirwaho” .

Asaba ko iby’urwo rugomo yakoze akavanaho urutoki rwa mugenzi we arutemye naho izindi akazikomeretsa byashingirwaho mu kugaragaza ko ari umunyarugomo ukoreshwa n’ubunywi bw’ibiyobyabwenge ngo dore ko nawe yiyemerera ko yari yasinze.

Usibye kuba urugomo rwo gukubita no gukomeretsa ruhanirwa n’amategeko, ubusinzi nabwo buhanwa nayo mu gitabo cy’amategeko ahana y’u Rwanda mu ngingo yacyo ya 599.

Iyo ngingo ivuga ko umuntu wese usinda ku mugaragaro, mu muhanda, mu kibuga, mu nzira, mu kabari, mu nzu y’imikino cyangwa ahandi hose hateranirwa, ahanishwa igifungo kuva ku minsi umunani kugeza ku mezi abiri n’ihazabu y’amafaranga kuva ku bihumbi 20 kugeza ku bihumbi 100 cyangwa kimwe gusa muri ibyo bihano.

Jean Pierre Twizeyeyezu