Umwanzi u Rwanda rufite si uwitwaje imbunda- Minisitiri Nsengimana

Minisitiri w’urubyiruko n’ikoranabuhanga Nsengimana Philbert yabwiye urubyiruko guhaguruka rugahangana n’ikinyoma, kuko ari cyo mwanzi u Rwanda rufite kugeza ubu.

GIF - 212.2 kb
Minisitiri w’urubyiruko n’ikoranabuhanga Nsengimana Philbert

Ibi yabivuze ubwo hasozwaga itorero ry’urubyiruko rw’abakorerabushake bafasha Polisi y’Igihugu mu kubungabunga umutekano, Youth Volunteering in Community Policing.

Umuhango wo gusoza iri torero ryiswe Imbanzabigwi, wabaye kuri uyu wa gatanu tariki ya 2 Ukuboza 2016, kuri petit Stade i Remera mu Mujyi wa Kigali.

Minisitiri Nsengimana yahamagariye urubyiruko gukoresha amahirwe bafite, bagashyiramo ingufu n’ubwenge bwabo bagahangana n’ikinyoma bakoresheje ikoranabunga ndetse n’ubundi bumenyi bahawe, bityo bagakomeza kwiteza imbere no kubaka igihugu cyababyaye.

Yagize ati “Umwanzi u Rwanda rufite ubu, si uwitwaje imbunda ahubwo ni uwitwaje ikaramu n’ikoranabuhanga kugira ngo yimakaze ikinyoma. Ntimuzemere ko ikinyoma giturana n’ukuri.

Hari abaharaniye ibyiza dufite kugera ubu, mukoreshe ubwenge n’ingufu zanyu mubibyaze umusaruro”.

JPEG - 305.4 kb
Basabwe guhaguruka bagahangana n’ikinyoma kitwaje ikaramu n’ikoranabuhanga

ACP Celestin Twahirwa ukuriye ishami rya polisi mu mikoranire yayo n’abaturage (community Policing), yagaragaje uruhare abakorerabushake bamaze kugira mu kubungabunga umutekano w’igihugu.

Yasabye ko aho bishoboka hose bashyigikirwa ndetse bakaba benshi kurushaho, abanyarwanda bagatekana bakiteza imbere ntacyo bikanga mu gihugu cyabo.

Yagize ati “Kuba abanyarwanda batekanye aba bakorerabushake babigiramo uruhare runini, kuko batumenyesha ikibaye cyose iwabo hakiri kare.

Bakorana n’inzego z’ibanze n’iz’umutekano, ibyaha bigakumirwa hakiri kare. Bakora n’ibindi bikorwa nko kubakira abakene ndetse bakarangira inzego z’umutekano ahakeneye inkunga nk’ibiza n’ibindi”.

Aba bakorerabushake batangaje ko bagiye kongera ingufu bagafatanya n’abandi kubungabunganga umutekano batangira amakuru ku gihe, bakumira icyaha kitaraba, ndetse bakaba aba mbere mu gufasha mu bikorwa by’iterambere.

Uwineza Gloria yagize ati “Iwacu habaga inzoga yitwa Nyirantare yari yararembeje abantu, ariko kubera gutanga amakuru yaracitse.

Hari n’ibiyobyabwenge twaciye kubera gutanga amakuru, kandi tugira uruhare rukomeye mu gufasha abakene dutabariza abaturage, mu gihe hari nk’ibiza cyangwa se ikindi kibazo cyavutse”.

GIF - 228 kb
ACP Celestin Twahirwa avuga ko umusanzu apolisi b’u Rwanda batanga mu kubungabunga amahoro mu mahanga ufite akamaro kanini

Abasoje itorero bagera ku 1500, ariko mu gihugu hose aba bakorerabushake bagize itorero “Imbanzabigwi” bagera ku bihumbi 60.

Abakorerabushake mu kubungabunga umutekano batangijwe mu mwaka wa 2013. Umusaruro wabo ngo upimirwa ku kuba ubu mu gihugu cyose hari umutekano usesuye.

Biteganyijwe ko mu mwaka wa 2020 hazaba hari abakorerabushake bagera kuri miriyoni imwe, aho bazafasha igihugu kwiteza imbere no gukaza umutekano wacyo mu buryo buzira amakemwa.

JPEG - 335.8 kb
Umuhango wo gusoza iri torero witabiriwe n’inzego z’umutekano zitandukanye

Ibitekerezo   ( 1 )

turashimira abantu bose bakora uko bashoboye kugirango tube tugeze aho tugeze dukomeze twiyubakire igihugu cyacu.tugire umutekano buri wese abe ijisho rya mugenzi dukumira icyaha kitaraba dutangira amakuru ku gihe.

pascal yanditse ku itariki ya: 3-12-2016  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka