Yagaragarije iki cyifuzo mu gikorwa cyo kwibuka Abatutsi bishwe bajugunywe mu mazi cyabereye i Nyanza ku cyuzi cya Nyamagana, tariki 11 Gicurasi, kikaba ari igikorwa Akarere ka Nyanza kakoze ku bufatanye n’Umuryango Dukundane Family, wiyemeje kuva muri 2007 kuzajya wibuka buri mwaka Abatutsi bishwe bagatabwa mu mazi.

Yagize ati “Nkaba mboneyeho gusaba Ibuka nk’impuzamiryango iharanira inyungu z’Abarokotse Jenoside yakorewe Abatutsi, ko hazatekerezwa uburyo bwo kwibuka ibindi byiciro bitajya byibukwa.”

Yakomeje agira ati “Harimo abatwitswe bagakongoka bagashira, abariwe n’ibisimba bikabamara, abishwe bataragira izina kubera ko bari bakiri batoya cyangwa bataravuka. Aha twavuga nk’abo bafomozaga ababyeyi babo bakabica badafite izina uyu munsi tukaba twavuga ngo turibuka kanaka cyangwa se tukaba twavuga ngo aruhukiye muri uru rwibutso.”

Yagarutse no ku kuntu Abatutsi batawe mu cyuzi cya Nyamagana bishwe agira ati “Barabavumburaga, bakabirukaho, abari hakurya cy’icyuzi bakabavugiriza induru maze bakabarohamo.”

Yakomeje agira ati “Aha twavuga nk’uwitwa Mudacumura Eraste wari umudivantisiti w’umunsi wa karindwi, baroshyemo nyuma yo kumutangatanga bakamushinyagurira ngo niyiyahure kandi ari umukristu. Bamwe mu bari bazi koga na bo babateraga amabuye kugeza bananiwe, bakarohama.”

Ibyo bikorwa by’ubugome kandi ngo byari bihagarariwe n’abajandarume barimo uwitwa Biguma, Birikunzira François Xavier bafatanyije n’agatsiko k’interahamwe n’abapawa kari kariyise Imbereberi.

Umuhuzabikorwa wa Dukundane Family, Jean Claude Rugero, yongeyeho ko hari n’abajugunywaga muri kiriya cyuzi bamaze kwicwa agira ati “Amakuru dufite ni uko (Abatutsi) bicirwaga ku misozi iri hafi aha bakabazana bakabarunda muri kino cyuzi, bamara kureremba babaye benshi bakazana amakamyo bakabatunda, bakabajyana kuri sitade ya Nyanza.”

Yanibukije ko ubundi icyuzi cya Nyamagana cyari cyashyizweho n’umwami Rudahigwa ngo kijye cyifashishwa mu kuhira, bityo abaturage beze bagire ubuzima bwiza, ariko ariya mazi akaba yarakoreshejwe ibitari byo agira ati “Turazirikana rero ko ubusanzwe amazi atanga ubuzima yabaye intwaro yicishijwe Abatutsi, aba imva yabo, none ubu yabaye irimbi ry’abacu.”

Yifuje kandi ko kuri kiriya cyuzi hazashyirwa ikimenyetso cy’uko hari Abatutsi bakijugunywemo, bityo abakinyura iruhande bakazajya bamenya amarorerwa cyakoreshejwe.

Umuryango Dukundane Family washinzwe muri 2007 n’abanyeshuri bize muri Saint André bari bibumbiye muri AERG, barangije amashuri bakanga gutatanya imbaraga bari basanzwe bahuza mu myigire n’imibereho yabo. Icyo gihe bihaye intego igira iti “Ubutwari, ubuvandimwe n’umurimo”.

Muri uwo mwaka basuye abarokotse Jenoside hirya no hino mu gihugu, basanga hari abafite ipfunwe n’agahinda byo kubura uko bibuka ababo kuko bishwe bakajugunywa mu mazi abandi bishwe n’ayo mazi kuko bayajugunywemo mbere, bakababwira ngo “abandi byibura bajya ku nzibutso bakagenda bakibuka ababo, ariko twebwe ntituzi aho bari, dufite agahinda kuko tudafite uko tubibuka.”

Ni aha bahereye biyemeza kuzajya bibuka Abatutsi bajugunywe mu mazi. Ni igikorwa bagenda bakorera hirya no hino mu gihugu, biyemeje gukora ku bufatanye n’Akarere ka Nyanza muri uyu mwaka wa 2024.

Tugarutse ku cyifuzo cyo kwibuka byihariye Abatutsi umuntu atavuga ngo baruhukiye aha, harimo abishwe batwitswe n’abariwe n’ibisimba bikabamara kimwe n’abana bapfuye batarabona izuba ngo banahabwe amazina, kugeza ubu ibyiciro byibukwa byihariye ni imiryango yazimye, abagore n’abana, kandi byose bigaragaza ubugome ndengakamere Jenoside yakorewe Abatutsi yakoranywe.