Ni umwanzuro wafashwe n’Ishyirahamwe ry’umupira w’amaguru mu Rwanda FERWAFA, nyuma y’uko ikipe ya AS Muhanga itanze ikirego isaba ko ikipe ya Espoir yafatirwa ibihano kubera uwo mukinnyi ukina mu cyiciro cya kabiri.

Amakipe ya AS Muhanga na Espoir FC yakurikiranaga ku rutonde rwa shampiyona y’ikiciro cya kabiri mu itsinda B, aho AS Muhanga yazaga ku mwanya wa gatatu n’amanota 55, ikarushwa na Espoir amanota abiri kuko yo yari ifite 57, zose ziri inyuma y’ikipe ya Vision FC iyoboye iryo tsinda n’amanota 62.

Ikipe ya AS Muhanga yakomeje gukubana na Espoir ishaka kugera mu cyiciro cya nyuma cy’imikino ya kamarampaka, hashakishwa ikipe zizamuka mu cyiciro cya mbere, ariko ntiyabigeraho kuko Espoir yakomeje kuyirusha amanota.

Ku makosa yaba yarakozwe na Espoir mu gukinisha umukinnyi utujuje ibyangombwa, byahaye amahirwe ikipe ya AS Muhanga kuko yabyuririyeho itanga ikirego muri FERWAFA, ariko ku nshuro ya mbere nticyahabwa agaciro kuko ngo hari ibimenyetso bitari byashyizwe mu kirego.

AS Muhanga yajuririye uwo mwanzuro wa FERWAFA uremerwa ndetse hanzurwa ko ikipe ya ESPOIR ihanishwa gukurwaho amanota atatu kuri buri mukino wakinwemo n’uriya mukinnyi bavuga ko atari yujuje ibyangombwa nk’uko bigaragara mu ibaruwa yo, ku wa 20 Gicurasi 2024, isubiza ku kirego cyatanzwe na AS Muhanga.

Uwo mwanzuro usubiza ibaruwa ya AS Muhanga ugira uti, “Dushingiye ku myanzuro ya Komisiyo y’imikino yateranye ku wa 20 Gicurasi 2024, yemeje ko ikipe ya Espoir FC ikuweho amanota atatu mu mikino yose ya Espoir, uyu mukinnyi yakinnyemo, tubandikiye tubamenyesha ko ikipe mubereye umuyobozi ari yo izasimbura Espoir mu mikino ya kamarampaka iteganyijwe ku wa gatatu tariki ya 22 Gicurasi 2024”.

Ikipe ya AS Muhanga n’abafana bayo bakiranye ibyishimo uwo mwanzuro, watumye bongera kugira icyizere cyo gukina imikino ya nyuma ya shampiyona y’icyiciro cya kabiri, ubundi cyari cyayoyotse kuko imikino yo mu matsinda yari isojwe iri ku mwanya wa gatatu.

MENYA UMWANDITSI

Ephrem Murindabigwi

Umunyamakuru

@ murieph

Reba inkuru zose nanditse ( 1505 )