Ibara ry’umweru: Padiri Nkundimana yasobanuye ko umweru, muri liturujiya ya Kiliziya Gatolika ari ibara ry’umunsi mukuru, rigasobanura ibyishimo. Rikoreshwa ku minsi mikuru ikomeye nka Noheri cg Pasika hamwe no ku minsi y’abatagatifu bakomeye.

Ibara ry’icyatsi: Icyatsi ni ibara risobanura Ubuzima bw’Imana mu bantu, rigakoreshwa mu bihe bisanzwe bya liturujiya.

Ibara rizwi nka move/violet: Ni ibara rigaragaza icyizere, rikaba ibara ryo kwihana no kwisubiraho, rikanagaragaza agahinda kuje icyizere.
Padiri Nkundimana yasobanuye ko iryo bara rikoreshwa mu gihe cya adiventi, mu gihe kibanziriza umunsi mukuru wa Noheli, ni ibara riranga kwitoza gutegereza amaza ya Nyagasani, Umucunguzi. Iryo bara kandi ngo rikoreshwa mu gisibo cy’iminsi 50 abakirisutu bitegura Pasika, rigaragaza kwihana no kwicuza. Ni ibara kandi rikoreshwa mu Misa zo gushyingura no gusabira abapfuye rishushanya icyizere cy’izuka n’ubugingo bw’iteka.

Ibara ry’Umutuku: Ibara ry’umutuku ngo risobanura ubutwari bugomba kuranga umukrisitu, rigasobanura imbaraga z’Imana ziri mu bantu, icyibatsi cya Roho Mutagatifu. Rikoreshwa mu Misa z’abahowe Imana bishwe banze guhakana ukwemera kwabo, mu Misa zo gukomezwa ndetse no mu Misa zo kwiyambaza roho mugatifu.

Padiri Nkundimana Theophile yasobanuye ko hari n’andi mabara akoreshwa gacyeya muri liturujiya ya Kiliziya ariko nayo akaba ari amabara yemewe ndetse afite ibisobanuro byayo. Muri ayo mabara akoreshwa gacyeya harimo iroza, ubururu ndetse n’umukara.

Ibara ry’iroza (rose): Ni ibara rikoreshwa ku cyumweru cya kane cya adiventi, no ku cyumweru cya kane cy’igisibo, rigasobanura ibyishimo bicagase bigana ku munsi mukuru wa Noheli cyangwa se wa Pasika.

Ibara ry’Umukara: Umukara, ni ibara rigaragaza agahinda (mbere ya Vatican ya kabiri), ngo ryakoreshwaga mu misa zo gushyingura, ariko ubu hakoreshwa move.

Ibara ry’Ubururu: Iryo ni ibara ryemewe muri liturujiya, rigakoreshwa mu misa zo kwiyambaza umubyeyi Bikira Mariya gusa ngo ntirikunze gukoreshwa cyane, hakoreshwa umweru.

Muri rusange Umupadiri ugiye guhimbaza Misa muri Kiliziya Gatolika aba agomba kuba yambaye ate?

Icya mbere, Padiri ugiye gusoma Misa agomba kwambara ni impishajosi, ni ukuvuga umwenda umufasha guhisha ibara ry’undi mwenda usanzwe yaba yambaye mu gice cy’ijosi, akambara ikanzu y’umweru ya Misa, isobanura ubusukurwe n’ubutagatifu bw’Imana umukristu agomba guharanira.
Nyuma y’iyo kanzu, akindikizaho umushumi (cingulum). Uwo mushumi ngo si uwo gufata ikanzu nk’uko hari ababyibwira batyo, ahubwo usobanura gukomera mu mbaraga z’Imana k’umupadiri kugira ngo ashobore gutura igitambo cy’Ukarisitiya.

Umupadiri kandi agomba kwambara Indangabubasha (Stola), umwenda wambarwa hejuru y’igishura, umanuka ku ntugu ugatendera ku gituza kugera hasi ariko udakora ku butaka).

Padiri Nkundimana avuga ko Indangabubasha, ari ikimenyetso, cy’ububasha Umupadiri aba yarahawe, bwo guhagarara imbere y’ikoraniro agakora uwo murimo mutagatifu mu cyimbo cya Yezu Kristu. Ikindi ngo kirazira ko Umupadiri yajya gusoma Misa atambaye iyo Ndangabubasha.

Hari kandi Igishura cya misa, igishura ngo gisobanura ko Imana ifite icyicaro mu koraniro, kandi amabara y’igishura ni yo ahinduka bijyanye n’igihe cya liturujiya Kiliziya irimo, kuko ikanzu ya Misa yo ngo igomba kuba ari umweru ntabwo ihindura ibara.

Ibindi biboneka ku myambaro y’Abapadiri ni ibimeyenyetso by’ukwemera, harimo ifi, yibutsa amabonekerwa Yezu yakoreye abagishwa amaze kuzuka akabera ku Kiyaga cya Tiberiyadi, ifi kandi ngo yakoreshwaga mu gihe cyo gutotezwa kw’abakirisitu, icyo gihe, abakirisitu bashushanyaga ifi ku butaka maze icyo kimenyetso kikabafasha kumenya aho bahurira bagasengera hamwe mu bwihisho cyangwa mu buvumo.

Hari kandi amagambo Alpha na Omega, bisobanura ko Imana ari ntangiriro ikaba n’iherezo ry’ibiriho byose.

Hari ikindi kimenyetso cy’ukwemera kigizwe n’inyuguti ya P inyuzemo inyuguti ya X, ibyo ngo bisobanura PAX, amahoro, ayo akaba ari amagambo ya mbere Yezu yavuze nyuma yo kuzuka, ati “Mugire amahoro”.

Inkongoro n’umugati bishushanyije ku mwambaro w’Umupadiri, ngo ni ikimenyetso cy’igitambo kigiye guturwa, ikindi kandi ni ibimenyetso Yezu Kristu yifashishije arema Ukaristiya ku wa Kane mutagatifu, avuga ko umugati uhinduka umubiri we naho divayi igahinduka amaraso ye.

Hari kandi inyuguti za HIS izo ngo zikomoka mu Rurimi rw’igiheburayo, zisobanura Yezu w’i Nazareti.

Mu bihe bisanzwe, Umupadiri atari mu Misa, yambara, imyenda isanzwe, ikanzu y’umweru, cyangwa y’umukara, cyangwa ishati ifite ‘coll romain’ iyo ikaba ifungwa mu ishati mu ijosi, mu ibara ry’umweru.
Padiri Nkundimana akaba yasobanuye ko uwo ari umwambaro w’Umupadiri wo muri Kiliziya Gatolika ishamikiye ku muco w’i Roma.

Mu gusoza, turashimira Padiri Nkundimana Théophile, wemeye gusobanura byinshi ku byo abantu bibaza ku myambarire y’Abapadiri kandi akaba yiteguye gukomeza gufasha mu gusobanukirwa n’ibikorerwa muri liturujiya ya Kiliziziya Gatolika.

MENYA UMWANDITSI

Mediatrice Uwingabire

Umunyamakuru

@ umureremedia

Reba inkuru zose nanditse ( 2000 )