Iyi Valley dam iri hafi n’umuhanda wa Kaburimbo uturuka Kagitumba ku mupaka uhuza u Rwanda na Uganda. Uretse kuba akoreshwa n’abaturage n’amatungo cyane cyane inka niho zinywera. Hejuru y’aya mazi hariho amarebe ndetse bigaragara ko adasa neza.

Rwabagabo Anastase atuye mu mudugudu wa Karusha mu kagali ka Rugarama ya 2, umurenge wa Musheli. Avuga ko aya mazi bayakoresha bazi neza ko ari mabi ariko ngo nta kundi babigenza. Ngo bazi neza ko bashobora kwandura indwara nk’inzoka, impiswi n’izindi zakomoka ku gukoresha amazi mabi ariko ngo nta kundi babigenza kuko nta handi bakura amazi meza.

Nubwo abaturage bifuza ko bakwegerezwa amazi meza ngo ikibazo cy’amazi ni imbogamizi mu karere ka Nyagatare cyane uduce twatuwe vuba. Mwumvaneza Emmanuel umunyamabanga nshingwabikorwa w’umurenge wa Matimba avuga ko bamaze gushyiraho ihuriro mu murenge wabo ryitwa One Family rikaba ariryo rifasha mu gukemura ibibazo nk’ibi by’amazi.

Agira ati “Duherutse gushinga ihuriro ry’Abanyamatimba ryitwa One Family kandi rizakemura bimwe mu bibazo hari n’icy’amazi. Abaturage bazajya batanga imisanzu buri kwezi ayo mafaranga azifashishwa mu kwiyegereza ibikorwa remezo bityo abaturage bunganire Leta.”

Mu gihe hatari haboneka amazi meza abaturage bakangurirwa gukoresha aya mazi ariko atetse cyangwa ayunguruwe hifashishijwe indobo zabugenewe ku bazifite dore ko ngo hari imishinga yagiye izitanga ku miryango imwe n’imwe.

Kuba aya mazi abaturage bayasangira n’amatungo ngo hari gahunda ihari yo kuzitira za Valley Dams bityo amatungo ntiyonone amazi akoreshwa n’abaturage.

Si imirenge wa Matimba na Musheli gusa abaturage bakoresha amazi yo muri Valley dams gusa kuko iki kibazo kiri no mu mirenge ya Rwimiyaga na Karangazi nk’uduce twatuwe nyuma kuko mbere igice kinini cy’iyi mirenge cyari pariki y’Akagera.

Sebasaza Gasana Emmanuel