Ubuyobozi bw’umurenge wa Bwishyura buvuga ko ikibazo cy’iriya ruhurura bwakimenyesheje akarere ariko ngo haracyakenewe ubundi buvugizi kuko hasaba akazi kenshi.

Umunyamabanga nshingwabikorwa w ‘umurenge wa Bwishyura Niyonsaba Cyriaque yatangarije Kigali Today ko babanje gukora umuyoboro w’amazi y’umugezi unyura mu mujyi hagati, kuko nawo wangizaga umuhanda, ariko imirimo yaho ntirarangira neza.

Uwo muyoboro unyura mu mujyi, wubatswe ku bufatanye bwa UN Habitat. Niyonsaba avuga ko nibaharangiza, bazakomeza gukora ubuvugizi kugira ngo n’iyo ruhurura yubakirwe amazi atararenga inkombe.

Umukozi twahuriye hafi y’ikigo nderabuzima cya Bwishyura ariko utarashatse ko tumuvuga izina, yavuze ko mu myaka itatu cyangwa ine ishize (2009), hari imodoka yataye umuhanda iragenda isanga umubyeyi wari uhetse umwana wigenderaga mu nzira y’abanyamaguru imuta muri iyo ruhurura nayo imusangamo iramwegamira.

Ngo yarwaye igihe gito ariko ikibabaje nyuma ngo yaje gushiramo umwuka n’umwana we bombi bitaba Imana mu bihe bitandukanye.

Gasana Marcellin