Mukashyaka Clemantine ni umwe mu babyeyi bahabyariye, avuga ko ubundi inzu y’ababyeyi bakirirwagamo yari ntoya cyane ku buryo nta bwinyagamburiro bwari burimo, ariko ngo inyubako yatumye babona ubwisanzure.

Ati “Hariya batwakiriraga mbere hari hatoya cyane ku buryo twabaga turi benshi, tukabyigana, icyokere kikatwica, ariko iyi nyubako yaranshimishije cyane kuko turisanzura.”

Umwe mu baje baherekeje umubyeyi uje kubyara avuga ko icyamushimishije ari uko aho bakirirwa ari hagari, ku buryo bahabwa serivisi neza nta muvundo.

Yagize ati “Aho ababyeyi babyarira si ho bitereza inshinge, si ho babyarira, hari icyumba cy’ababyeyi, mbese buri serivisi iri ukwayo. Birashimishije cyane.”

Umuyobozi w’Ikigo nderabuzima cya Karangazi, Kayumba Bernard, yabwiye RBA ko mbere inzu y’ababyeyi yari igizwe n’ibyumba bibiri gusa, aho bashoboraga kubyaza umubyeyi umwe gusa ariko iyi nyubako nshya ikaba ishobora kwakira ababyeyi barenze batatu babyarira icyarimwe.

Ababyeyi bategereje kubyara ngo bashobora kwakira batandatu icyarimwe, ndetse ikaba inafite aho ababyeyi bamaze kubyara baruhukira mu gihe hakurikranwa ubuzima bwabo n’ubw’abana bamaze kuvuka.

Kuba iyi nyubako ari nini ngo byafashije n’abaganga gutanga serivisi neza, kubera gukorera ahantu hagari.

Uyu ati “Natwe dutanga serivisi turishimye, nagira ngo mbonereho no gushimira Perezida wa Repubulika udahwema kutugezaho ibyiza, udahwema gutekereza ku baturage, rwose ndabishima mbikuye ku mutima.”

Ni inzu ifite ibyumba umunani ikaba itangirwamo serivisi zose umubyeyi akenera, yubatswe ku gaciro k’Amafaranga y’u Rwanda arenga 200,000,000.