Ibi babisabwe tariki 12/06/2014 na polisi y’u Rwanda ikorera mu karere ka Nyamasheke muri iki cyumweru cyahariwe ubufatanye bw’abaturage na polisi, mu bikorwa byo gucunga umutekano w’abantu n’ibintu.

Supt Jules Rutayisiye ukuriye polisi mu karere ka Nyamasheke yabwiye uru rubyiruko ko aho isi igeze hari ibirangaza byinshi bishobora kwica imbere heza habo niba badafashe ingamba zo kubirwanya, abasaba kwibuka ibintu byose bishobora kubashuka binyuze mu ikoranbuhanga, amafaranga n’ibindi.

Yabibukije ko indangagaciro z’Abanyarwanda arizo nkingi y’ubuzima bwiza bw’abakiri bato, kubaha, kumvira, gukora cyane ufite intego no gukunda igihugu cyawe ukaba wakitangira ko ari bimwe bizafasha kuba abaturage babereye u Rwanda.

Yagize ati “ni mwe muzubaka u Rwanda mugomba kwitegura hakiri kare, mugashyira umutima ku masomo mwiga, indangagaciro nyarwanda zikababera itara ribamurikira mu nzira yo gukunda igihugu no kugikorera, uyu niwo mwanya wo kubikora rero”.

Inspector of Police Mutabaruka Deus ushinzwe guhuza ibikorwa by’abaturage na polisi, yavuze ko urubyiruko rujya mu biyobyabwenge ruba rutakaje imbaraga z’ejo igihugu cyirutezeho ko uretse kurwangiza rugatuma bishora mu byaha bituma hari amaboko y’igihugu apfa ubusa bityo bikangiza iterambere n’umuvuduko igihgu cyifuza ngo cyiyubake vuba.

Yagize ati “umwanzi wanyu ukomeye mukwiye kwirinda ni ibiyobyabwenge kuko bibangiza, bikabicira ejo hazaza, ndetse mu kagwa mu byaha bituma musenya ibyo mwubatse, nimubyirinde ndetse mufashe n’abandi kubireka, aho binaniranye hitabazwe izindi ngufu zizatuma babikumira bitaraba icyorezo, igihugu kirusheho kugira urubyiruko rufite ejo heza kandi ruzubaka koko igihugu”.

Muri ibi biganiro polisi yasabye abanyeshuri kwirinda ihohoterwa iryo ariryo ryose cyane irikorerwa abana basabwa kurivuga aho ryagaragaye no kwirinda ko ryabaho kuko ryangiza ubuzima n’amaboko y’igihugu ejo hazaza.

Umugwaneza Jean Claude