Muhizi Etienne, umuyobozi w’urwunge rw’amashuri rwa Mutengeri rwo mu murenge wa Nkomane atangaza ko hari abana bagita amashuri ahanini kubera inyota y’amafaranga bajya gushakisha hirya no hino nko gusoroma icyayi no mu yindi mirimo inyuranye.

Ati “Usanga hari abana bata ishuri ku mpamvu zitandukanye. Zimwe murizo ni uko hari abana bata ishuri bagiye kureba amafaranga, rimwe na rimwe basoroma icyayi, batwara imizigo, abandi bajya gutashya inkwi bakazigurisha”.

Umuyobozi w’akarere ka Nyamagabe wungirije ushinzwe imibereho myiza y’abaturage, Byiringiro Emile avuga ko hari ingamba zifatika zo guhangana n’ikibazo cy’abana bata ishuri nko kwigisha ababyeyi bakumva ko ari inshingano zabo gukurikirana imyigire y’abana.

“Turi gushyira imbaraga mu kwigisha ababyeyi. Iyo umubyeyi atamwitayeho cyangwa ngo amukurikirane, niho usanga ikibazo cyo guta ishuri kivuka, umwana yabuze ibikoresho by’ishuri, icyo kwambara, icyo kurya,… Ibyo rero kugira ngo tubigereho ni uko tuzifashisha inzego z’ubuyobozi na komite z’ababyeyi,” Byiringiro.

Mu zindi ngamba harimo no guhwitura ababyeyi batita ku burere bw’abana babo no kuganira n’abakoresha abo bana mu mirimo itandukanye bakibutswa ko bibujijwe, ndetse ubu akarere kakaba karanahize ko nta mwana n’umwe uzata ishuri muri uyu mwaka.

Emmanuel Nshimiyimana