Umuyobozi w’akarere ka Kirehe, Murayire Protais, yasabye abitabiriye inama gukomeza kunoza ireme ry’uburezi bita ku burezi bw’umwana abasaba gukosora ibyo baba barasanze bitagenda neza, yakomeje asaba ko byaba byiza iyi nama y’uburezi ishyizeho uburyo bwo guhana ababyeyi batita ku burere bw’abana babo.

Umuyobozi w’Akarere kandi yabibukije ko nta terambere igihugu cyageraho badahagurukiye uburezi, akaba abasaba ko byaba umuhigo igihugu cyacu giteye imbere.

Umuyobozi wa Polisi mu karere ka Kirehe yasabye abitabiriye inama gushyira hamwe bakaba bashyiraho Anti-Crime club mu bigo by’amashuri mu rwego rwo gukomeza kurwanya ibyaha bishobora kuba byagaragara mu mashuri nko kureba abanyeshuri batwara inda, hamwe no gukora uburara butandukanye.

Umuyobozi w’akarere yagize ati: “Mu myanzuro rero twagiye tuganiraho harimo kwihutisha imyiteguro y’amashuri, abanyeshuri bose bakazaba bari mu ishuri ku itariki esheshatu kandi bagakurikira n’amasomo abarimu bose bahari”.

Muri iyi nama, abayobozi b’ibigo bibukijwe ko abanyeshuri ataribo bakwiye gukora isuku mu kigo baje gutangira amashuri, ahubwo ko bakwiye gusanga imyiteguro yose yararangiye bagahita batangira amasomo.

“Ibijyanye n’isuku bigomba gukorwa mbere, ntabwo isuku ikorwa n’abanyeshuri kuri wa munsi wo gutangira amashuri kuko uba ari uw’amasomo, ibyo byo bizaba byakozwe mbere y’uko abanyeshuri binjira mu mashuri”, Murayire.

Iyi nama yari yitabiriwe n’abayobozi b’ibigo by’amashuri, abakozi bashinzwe uburezi mu mirenge hamwe n’ababyeyi bashinzwe ibijyanye n’uburezi ku bigo by’amashuri.

Grégoire Kagenzi