Nduwayesu Elie, Umuyobozi wa FCYF wita ku burezi bw’abana bafite ubumuga bwo kutumva no kutavuga n’abana b’imfubyi yabwiye Kigali Today ko mu mwaka wa mbere yakiriye aban 23 gusa kubera ubushobozi buke bw’inyubako, yemeza ko abonye amashuri bigiramo n’aho barara yabafasha kwiga bose.

Uyu mushinga ufite ishuri ryigisha abana bafite ubumuga bwo kutumva no kutavuga ururimi rw’amarenga, gusoma no kwandika, ururimi rw’icyongereza n’imyuga itandukanye nko kudoda, kubaza no gukora amashanyarazi.

Kubera imyumvire y’ababyeyi ikiri hasi, abana bavukanye ubu bumuga ngo bahura n’akato gakomeye iwabo aho badafatwa nk’abandi bana, Umuyobozi wa FCYF atanga urugero rw’umwana bakiriye wabaga kandi akarara hafi y’ingurube, ngo amavunja yuzuye umubiri wose kubera ko ababyeyi be batamwitagaho.

Iyo abana bageze ku ishuri baca ukubiri n’akato babana na ko iwabo, mu masomo bahabwa harimo n’ajyanye n’uburenganzira bwabo nk’uko byagarajwe.

Ngo bahawe inkunga na Leta ibinyujije muri Minisiteri y’Abagore n’Iterambere ry’Umuryango (MIGEPROF) ingana miliyoni imwe yamufashije kugaburira abana mu gihembwe ariko kuva icyo gihe, nta kibazo yari yagira cyo kugaburira abana 57 n’abakozi babo 13.

Nshimiyimana Leonard