Rucagu Boniface avuga ko zimwe mu ndangagaciro ziboneka muri Kmainuz aya ULK harimo kwicisha bugufi n’ubudashyikirwa bigaragaza ko ULK yatangiye iha abantu ubwenge ariko ibaha n’umutima wo gukoresha neza ubwenge itanga.

Umuyobozi w’itorero ry’igihugu ahamagarira abanyeshuri bo mu Rwanda guhaha ubwenge ariko bemera kurerwa no gutozwa indangagaciro na kirazira kugira ngo birinde ivangura, kubiba amacakubiri n’ingengabitekerezo ya Jenoside, birinda ko byababaho nkuko byabaye mu bihe byashize aho abigaga bari bafite ubumenyi ariko nta ndangagaciro kugera bakoze Jenoside.

Rucagu Boniface, umuyobozi w’itorero ry’igihugu.

Abadahigwa mu burezi ni zo ntore za Kaminuza yigenga ya Kigali ishami rya Gisenyi zigera kuri 2891, bamwe mu bitabiriye itorero barimo Amani Balinda yemeza ko itorero rizabafasha gusigasira indangagaciro basigiwe n’abakurambere b’Abanyarwanda.

Docteur Sekibibi Ezechiel umuyobozi wa Kaminuza yigenga ya Kigali avuga ko kuba muri ULK ayobora hatangijwe itorero ry’igihugu bizunganira andi masomo n’uburere bukwiye bari basanzwe batoza abo barera.

Avuga ko itorero muri Kaminuza rigambiriye gukomeza kwigisha abanyeshuri indangagaciro zo gukunda igihugu ariko basanzwe batanga ubumenyi bwo kumenya Imana, bijyana n’izindi mpanuro enye zirimo kuba inyangamugayo, gukunda umurimo, guca ubugufi, no gukora umurimo unoze.

Mu bindi muri ULK bigisha harimo ibifasha abana kuba Abanyarwanda beza bakunda Imana n’abantu baharanira guteza imbere igihugu, kandi buri mwalimu asabwa kwigisha abanyeshuri gukoresha ubumenyi atanga muri Kaminuza kuzabukoresha neza ageze ku murimo; nk’uko Docteur Sekibibi akomeza abisobanura.

Sylidio Sebuharara