Ubinyujije muri gahunda yo guhugura abarimu, uyu muryango wizera ko hari ikizere ko bazagira amakuru ahagije bazifashisha mu kwigisha abarimu ibijyanye no kwihangira imirimo kugira ngo banabikuriremo.

Pamela Munyana umuyobozi wa Idea 4 Africa avuga ko iyi gahunda yo guhugura abarimu izabasigira amakuru ahagije kugira ngo nabo bahe ubumenyi abanyeshuri buzabafasha gukura bafite indangagaciro zo kwihangira umurimo.

Yagize ati “Iyi gahunda yo guhugura abarimu igamije gufasha abarimu bahorana n’urubyiruko kugera ku bumenyi buhagije buzabafasha guha abanyeshuri ubwenge bukenewe mu kubafasha kwinjira muri bizinesi.”

Uyu muryango usanzwe ukorana n’abarezi, abanyeshuri bo mu mashuri yisumbuye n’urubyiruko muri gahunda zitandukanye.

Zimwe muri izo zirimo gahunda y’amahugurwa yitwa ‘Wheaton innovation leadership laboratory’ ihuza abanyeshuri 200 bihangiye imirimo baturuka hirya no hino mu gihugu.

Gahunda y’amahugurwa yabaye kuri uyu wa Kabiri tariki 3 Werurwe 2018, yahaye abarimu ubumenyingiro bazajyana mu mashuri bigishamo.

Umwe mu bayitabiriye witwa Faithful Abaho yavuze ko abarimu banahawe umwanya wo guhanahana ubunararibonye nabyo byabongereye ubumenyi ku bwo bari basanganywe.

Ati “Iyi gahunda ni ingirakamaro kuri twe abarimu n’abanyeshuri kuko idufasha kwigira ku babikoze neza kandi ikanatinyura abanyeshuri twigiza gufata ibyemezo mu kwihangira imirimo.”

Abahuguwe ni abarimu bo mu mashuri yisumbuye asanzwe akorana bya hafi na Idea 4 Africa. Abayitabiriye bahawe kandi imfashanyigisho zizabafasha gukomeza kwigisha abanyeshuri barera.