Umuyobozi Mukuru wa NESA, Dr Bernard Bahati, yasobanuye ibyavuye mu bizamini

Umuyobozi Mukuru w’Ikigo gishinzwe Ibizamini n’Ubugenzuzi bw’Amashuri (NESA), Dr Bernard Bahati, yagize ati "Muri aba banyeshuri bose barangije amashuri yisumbuye, uwagize ikigereranyo cyo hejuru ni ukuba afite 60, ntabwo ari amanota 60, hanyuma uwabashije kugera ku bipimo ngenderwaho yabonye ikigereranyo cy’amanota 9."

Minisiteri y’Uburezi ivuga ko muri rusange abari biyandikishije gukora ibizamini bya Leta mu mwaka wa 2023 bari 80,892 ariko abitabiriye kubikora bangana na 80,525, bahwanye na 99.55%.

Abarangije mu burezi rusange batsinze ibizamini bangana na 95.4% muri 48,699 bakoze ikizamini, mu gihe mu mwaka ushize abari batsinze bari 94.6%.

Abarangije amashuri nderabarezi mu mwaka ushize batsinze ku kigero cya 99.9%, ubu abatsinze bakaba bari 99.7% muri 4,001 bakoze ikizamini.

Ni mu gihe abarangije amashuri ya tekiniki, imyuga n’ubumenyingiro batsinze umwaka ushize bari 97.8%, naho abatsinze muri uyu mwaka wa 2023 bari ku rugero rwa 97.6% muri 28,192 bakoze ikizamini.

Mu bishimiye amanota y’ibizamini by’uyu mwaka wa 2023 hari Ishuri ry’Imyuga ryitwa "Centre For Champions TSS" ry’Umuryango "AEE-Rwanda" riri i Rwamagana, aho abaryizemo bose uko ari 105 ngo babonye amanota aza mu ya mbere.

Uwitwa Ntakinanirimana Elissa wabaye uwa mbere muri iryo shuri no ku rwego rw’Igihugu mu bijyanye n’ingufu, avuga ko agiye gukomeza kwiga uko yabyaza amazi amashanyarazi.

Ntakinanirimana Elissa wabaye uwa mbere mu Gihugu mu bijyanye n’ingufu, avuye guhembwa mudasobwa muri Minisiteri y’Uburezi

Habyarimana Canisius uyobora Centre for Champions, we avuga ko gutsinda kw’abanyeshuri byavuye ku gukorana kw’abarezi n’abayobozi mu micungire y’abanyeshuri no kubatera imbaraga.

Kubona inguzanyo ya buruse ntibihuzwa n’amanota menshi gusa

Minisitiri w’Uburezi, Gaspard Twagirayezu avuga ko nta manota ateye kimwe abantu bazashingiraho bemeza ko batsindiye buruse yo kwiga muri Kaminuza, kuko ngo kubona iyo nguzanyo bidashingiye gusa ku bwinshi bw’amanota ahubwo uyifuza azajya ayisaba.

Minisitiri Twagirayezu agira ati "Ababaza bati ’ese kuki hadahoraho amanota amwe buri gihe, buri wese akajya amenya ngo ’niba nagize aya nabonye buruse’, icyo navuga ni uko kubona iriya nguzanyo yo kwiga muri Kaminuza ntabwo bivuze ngo niba nabonye ano manota nzahita nyibona’, kuko murabizi ko isabwa."

Twagirayezu avuga ko umuntu uhabwa inguzanyo ya buruse abanza kwemerwa na Kaminuza, bigaterwa na none n’inguzanyo ihari uko ingana hamwe n’imyanya yabonetse muri Kaminuza, ndetse ko iyo mibare ihora ihinduka buri mwaka.

Abiga muri Champions TSS barimo kwitoza isomo ry’amashanyarazi

MENYA UMWANDITSI

Simon Kamuzinzi

Umunyamakuru

@SimonKamuzinzi

Reba inkuru zose nanditse ( 2466 )