Hari abanyeshuri bafungirwa amazi kubera ko banengwa kuyangiza

Kuri uyu wa Mbere tarki 5 Gashyantare 2018, niho iki kibazo cyatahuwe ubwo abakozi ba Ministeri y’uburezi basuraga Akarere ka Kayonza kugira ngo barebe uko uburezi buhagaze.

Dr Martin Ntawubizi, Umuyobozi w’ishami rya Kaminuza y’u Rwanda mu karere ka Nyagatare, umwe mu bagize itsinda ry’Abasura ibi bigo yavuze ko ari inshingano za bose kuko n’abarezi baba bakwiye gutoza abanyeshuri babo gufata neza ibikorwaremezo.

Yagize ati "Usanga nta mirimo yindi babatoza uretse kubigisha amasomo asanzwe. Kutabatoza ibyo ni ko kubima uburere, bongeraho no kubabuza uburenganzira bwabo kuko twasanze babima amazi n’umuriro.”

Mu mashuri amwe amwe hari ahatagira amashanyarazi nko mu buryamo bw’abanyeshuri

Ministeri y’Uburezi (MINEDUC) yasabye ibigo by’amashuri guha abana uburenganzira ku muriro n’amazi byabafunze, kugira ngo babashe kwiga uko bikwiriye.

Bamwe mu barezi usanga bitana ba mwana n’ababyeyi, ah bavuga ko uruhare runini ari urw’ababyeyi kurera abana babo, nk’uko umwarimu witwa Mukansoro Marie Jeanne yabivuze.

Ati ”Abana baturuka mu miryango yifashije usanga ntacyo bakora iwabo. Bagera na hano ntibagire ikintu batekereza gukora, ndetse nta n’ubwo bita ku byo bahasanze.”

Abanyeshuri baganiriye na Kigali today basobanura ko bamenyereye imvugo ivuga ngo ”Nta munyeshuri uba mukuru”, ariko basaba ubukangurambaga bubumvisha ko bagomba kugira inshingano.

Abakozi ba MINEDUC barimo kuzenguruka hirya no hino mu gihugu bagenzura ibitera ireme ry’uburezi guhora rinengwa

MINEDUC ivuga ko kwima abana ubu burenganzira bibateza umwanda, ingeso mbi zirimo ubusambanyi no kunywa ibiyobyabwenge no kubura uko biga.

Yatangije gahunda y’ubukangurambaga mu mashuri hirya no hino mu gihugu; hagendewe ku nsanganyamatsiko igira iti ”Uburere n’Uburezi bwiza, ishingiro ry’Uburezi bufite ireme.”

MENYA UMWANDITSI

Simon Kamuzinzi

Umunyamakuru

@SimonKamuzinzi

Reba inkuru zose nanditse ( 2457 )