Mushimiyimana akora ubucuruzi bw’imyenda mu mujyi wa Ruhango, yaretse kwiga ageze mu mwaka wa kane w’amashuri yisumbuye ahita ashaka, yakomeje gushaka uko yakwiga biranga. Nyuma yaje kwibaza uko ubuzima bwe buzamera abuburira igisubizo.

Nyuma yaje kugira amahirwe yo gukorana n’amabanki atangira kwaka inguzanyo atangira kwagura ubucuruzi yakoraga ubu ngo amaze kugera ku rwego rushimishije.

Agira ati “mbere nakoraga ubucuruzi budakomeye aho nakoreshaga ibihumbi 100 gusa, nabonaga ntaho nzagera nk’uko nabyifuzaga. Naje kugira amahirwe banki y’abaturage inguriza miliyoni 4 mu mwaka wa 2006 nagombaga kwishyura mu myaka 3. Byaranshimishije kuko iyi nguzanyo nashoboye kuyishyurira ku gihe”.

Uyu mugore avuga ko guhera ubwo yatinyutse amabanki atangira gukorana nayo, kugeza ubu akaba akorana na banki ya Duterimbere, aho avuga ko bakorana neza akaba basha gukora akunguka kandi akanabasha kwishyura.

Avuga ko afite abana 2 biga muri kaminuza, umwe arihirwa FARG undi niwe umurihirira, akanabasha gukemura ibibazo byinshi byo mu rugo. Akavuga ko ubwo atagize amahirwe yo kwiga agomba gukoresha ubwenge n’imbaraga kugirango abana be bazige ayo atize.

Agira inama abandi bagore bagifite imyumvire iri hasi ishingiye kukwitinya, ko bakwiye kugana banki bakaka inguzanyo zizabasha gukora bagatera imbere.

Eric Muvara