Amafi ari gucuruzwa mu karere ka Rubavu ari guturuka i Kampala na Goma hamwe na Kigali, ibi bikaba byatumye harimo n’abatangiye kuzana amafi apfuye. Mu mpera z’icyumweru gishize, mu karere ka Rubavu hafatiwe ibilo birenze 300 by’amafi yaboze yavanywe i Kigali.

Kuva taliki 16/09/2013 uburobyi mu kiyaga cya Kivu byabaye buhagaritswe kugera 12/11/2013 kugira ngo bifashe amafi n’isambaza kwiyongera kuko byari bitangiye kugabanuka bikabije.

Siborurema Boudouin ukuriye ihuriro ry’abarobyi mu karere ka Rubavu avuga ko mu myaka icumi ishize uburobyi mu kiyaga cya Kivu mu karere ka Rubavu bashoboraga kwinjiza toni 40 mu kwezi none ngo ubu ntibarenza toni 4.

Bimwe mu bitera amafi kubura ngo harimo kuba mu burobyi hari ubushimusi bakoresha imitego ya Kaningini na supernet bigatwara n’amafi atagombaga kurobwa.

Siborurema avuga ko MINAGRI na RAB byagombye kwegera abarobyi bikabafasha kubona imitego myiza bakoresha mu kuroba, ubundi hagakorwa ubushakashasti mu kiyaga cya Kivu.

Ngo iyo abarobyi bari mu Kivu babona amafi mu mazi ariko bajya kuyaroba bakayabura, bakavuga ko habaye impinduka mu mikurire y’amafi kuburyo abarobyi bagombye gufashwa kubona ubundi buryo bwo kuroba.

Sylidio Sebuharara