Nk’uko bitangazwa n’ikigo cy’igihugu gishinzwe ibarurishamibari, bimwe mu byatumye ibiciro bizamuka ho 3,68 % mu kwezi kwa Kamena ni ibiciro by’ibiribwa n’ibinyobwa bidasembuye byazamutseho 4,41% hamwe n’ibiciro by’uburezi byageze kuri 35,18 %.

Hagereranyijwe ukwezi kwa Kamena 2013 na Kamena 2012, ibiciro by’ibintu bitarimo ibiribwa n’ibikomoka ku ngufu byarazamutseho 3, 39 %.

Naho hagereranyijwe ukwezi kwa Gatandatu (Kamena 2013) n’ukwezi gushize kwa gatanu (Gicurasi 2013) ibiciro byagabanutseho 0,03%, iri gabanuka rikaba ryaratewe n’igabanuka ry’ibiciro by’amazu, amazi, amashanyarazi, gazi n’ibindi bicanwa byagabanutseho 2,05% n’ibiciro by’ubwikorezi byagabanutseho 0,29%.

Ku birebana n’ibiciro mu cyaro mu kwezi kwa Kamena 2013 ibiciro ku masoko mu byaro byiyongereyeho 4,61% ugereranyije na Kamena 2012, ihinduka ry’ibiciro ku masoko mu byaro mu kwezi kwa gatanu (Gicurasi 2013) ryari ku kigereranyo kingana na 4,85%, bikaba byaratewe n’ibiciro by’ibiribwa n’ibinyobwa bidasembuye byazamutseho 6,37% hamwe n’ibiciro by’amazu, amazi, amashanyarazi, gazi n’ibindi bicanwa bizamukaho1,59%.

Hagereranyijwe ukwezi kwa gatandatu (Kamena 2013) n’ukwezi kwa gatanu (Gicurasi 2013) ibiciro byagabanutseho 0,63% mu cyaro, iri gabanuka ahanini ryatewe n’igabanuka ry’ibiciro by’ibiribwa n’ibinyobwa bidasembuye 0,91%.

Hagendewe ku ihindagurika ry’ibiciro mu mujyi no mu cyaro mu kwezi kwa Kamena 2013 ibiciro ku isoko mu Rwanda byiyongereyeho 4,29% ugereranyije na Kamena 2012. Hinduka ry’ibiciro ku isoko mu Rwanda mu kwezi kwa gatanu (Gicurasi 2013) ryari ku kigereranyo kingana na 4,21% bikaba byaratewe n’ibiciro by’ibiribwa n’ibinyobwa bidasembuye byazamutseho 5,93% hamwe n’ibiciro by’uburezi byazamutseho 23.18%.

Ubuyobozi bw’ikigo cy’igihugu gishinzwe ibarurishamibare buvuga ko bugereranyije ukwezi kwa gatandatu (Kamena 2013) n’ukwezi kwa gatanu (Gicurasi 2013) ibiciro byagabanutseho 0,43%. Iri gabanuka ahanini ryatewe n’igabanuka ry’ibiciro by’ibiribwa n’ibinyobwa bidasembuye 0,56%.

Sylidio Sebuharara