Gatsibo: Abanyabukorikori batanu bazahagararira abandi bamenyekanye
Abazahagararira akarere ka Gatsibo mu marushanwa y’ubukorikori yateguwe na Minisiteri y’Ubucuruzi n’Inganda (MINICOM) bamenyekanye. Aya marushanwa azitabirwa n’abahagarariye kuva nzego z’ibanze kugeza ku rwego rw’Igihugu.
Abazitabira aya marushanwa agamije guteza imbere abanyabukorikori no kumenyekanisha ibikorwa byabo, bamenyekanye mu marushanwa yo kubatoranya yabaye kuwa Kane tariki 30/05/2013, mu murenge wa Rugarama mu Karere ka Gatsibo.
Hatoranyijwe abanyabukorikori batanu bazahagararira Akarere ka Gatsibo ku rwego rw’Intara. Batoranyijwe hakurikijwe ubwiza n’umwimerere w’ibihangano byabo, nk’uko bitangazwa n’umukozi w’Akarere ushinzwe amakoperative, Celestin Sengabire.
Yagize ati: “Twizeye tudashidikanya ko aba banyabukorikori bazahagararira Akarere kacu ku rwego rw’igihugu kuko twarabateguye bihagije kandi tugerageza kubakorera ubuvugizi uko dushoboye mu rwego rwo guteza imbere ibihangano byabo.”
Batanu batoranyijwe kandi hakurikijwe ibyiciro barimo uko ari bitanu birimo abadoda imyenda, abakora imitako, ababumba, abakora ibikomoka ku ruhu n’ababaza.
Si ubwa mbere aya marusha abaye kuko ubusanzwe aba buri mwaka, akunze kuba hagati mu mwaka mu kwezi kwa Gicurasi na Kamena cyangwa hagati y’ukwezi k’Ugushyingo n’Ukuboza umwaka urimo urangira.
Benjamin Nyandwi
Ibitekerezo
Ohereza igitekerezo
|