Iryo murikagurisha ritangira saa mbiri za mu gitondo rikageza saa yine z’ijoro ni iry’umugabo witwa Nzeyimana JMV, umucuruzi waje aturuka mu karere ka Huye.

Acuruza ibintu by’ubwoko bwose bisanzwe biboneka henshi mu Rwanda, ariko umwihariko we aba yagabanuye ibiciro ugasanga abantu baramwitabira ari benshi.

Nzeyimana avuga ko amakuru ya Karongi yari aherutse ari ayo muri za expo rusange zagiye zibera i Kigali mu myaka yashize (2004-2005), ariko ngo nyuma yo kubona ko nta expo z’uturere cyangwa iz’Intara zigeze zitekerezwa, yigiriye inama yo kwihimbira expo ye bwite.

Ati: “Iyi expo ni njye wayiteguriye, ariko nahayemo umwanya abandi bantu bikorera, harimo Abanya-Kenya bacuruza imiti, njye ncuruza ibintu by’ubwoko bwose bisanzwe biboneka mu maduka yo mu Rwanda, hano nahazanye na restaurant na bar n’ibindi”.

Expo ya Nzeyimana iritabirwa cyane ariko ugasanga ahitabirwa kurusha ahandi ari mu nzoga no muri restaurant nk’uko abyivugira agira ati: “Hano nabonye bakunda iminywere n’imirire cyane”.

Ibi kandi biranemezwa n’abasore nahasanze baje kugura akayoga kazwi ku izina rya Africana. Nababajije niba ari inzoga gusa zabashimishije bambwira ko n’ibindi barimo kubigura, gusa ngo ako kayoga basanzwe bagakunda, bityo kukabona kuri 200FRW ngo byabanejeje cyane. Gasanzwe kagura 300FRW.

Kubera ubwinshi bw’abantu baba bahari ninjoro, ba rusahurira mu nduru nabo ntibahatangwa. Ubwo naganiraga na Nzeyimana, hirya haturutse insoresore iraza ibatura icupa rya Uganda Waragi rinini iba irirukanse.

Ku bw’amahirwe abasore bashinzwe gucunga umutekano wa Expo Nzeyimana yahaye ikiraka, bamwirutseho baramufata bamwambura rya cupa, ubundi bamusigira umupolisi asigara amukosora.

Gasana Marcellin