Icyakora, haracyibazwa niba urwo ruganda ruzabona uwo musaruro cyane cyane imyumbati, kuko mu mirenge ya Gatumba, Muhororo na Ngororero ndetse na Kageyo yegereye urwo ruganda usanga nta mirima minini ihinzwemo imyumbati.

Umuyobozi wungirije ushinzwe ubukungu mu karere ka Ngororero, Emmanuel Mazimpaka, avuga ko kuba harongewemo n’imirimo yo gutunganya ibigori bizatuma urwo ruganda rufite ubushobozi bwo gutunganya toni 15 ku munsi rutabura umusaruro wo gukoresha.

Kuri ubu, abahinzi barasabwa gushyira imbaraga mu guhinga ibigori n’imyumbati kuko begerejwe isoko.

Icyakora ntiharanashyirwa ahagaragara uzakoresha urwo ruganda ubundi rwubatswe n’akarere ka Ngororero ariko inama njyanama y’ako karere ikaba iherutse gutanga inama yo kurwegurira abikorera akaba aribo barukoresha.

Urwo ruganda ruri mu murenge wa Muhororo rubaye urwa kabiri rutunganya umusaruro w’ubuhinzi rugiye gutangira imirimo mu karere ka Ngororero, nyuma y’uruganda ruciriritse rukora imitobe na divayi rwubatswe na rwiyemezamirimo mu murenge wa Nyanjye.

Ernest Kalinganire