Moto zatanzwe na KOTAMOKA ni icyiciro cya gatatu cya moto 56, zose hamwe zaguzwe ku nguzanyo ya COPEC Inkunga ikorera mu karere ka Karongi.

Moto zatanzwe ku mugaragaro n’abayobozi batandukanye, barimo umuyobozi wa Police mu karere ka Karongi, Umunyamabanga Nshingwabikorwa w’umurenge wa Bwishyura, Perezida wa Federation y’abamotari ku rwego rw’igihugu n’Umucungamutungo wa COPEC Inkunga.

Usibye izo moto, KOTAMOKA yanatangiye mitiweli abanyamuryango bayo 200, ibaha n’icyangombwa kizajya kibaranga kugira ngo batandukane n’abakora ubumotari batabifitiye uruhushya.

Mu muhango wo gutanga ibyo byose, hanabayemo igikorwa cyo kuremera umupfakazi wo mu kagari ka Kiniha, umurenge wa Bwishyura, wacitse ku icumu rya Jenoside yakorewe Abatutsi muri Mata 1994.

Bamuteye inkunga yo kuzamusanira ikikoni cy’inzu ye kimaze gusaza.
KOTAMOKA yanageneye ishimwe ry’ihene Ndacyayisenga Pelagie, umukobwa umwe rukumbi ukora ubumotari mu karere ka Karongi kose.

Perezida wa koperative Bavakure Louis yavuze ko ibyo babikoze mu rwego rwo gushyigikira iyo nkumi y’imyaka 27 kugira ngo azatere n’abandi ishyari ryo kwitinyuka bagakora imyuga bita iy’abagabo.

Umuhango wabimburiwe n’umukino w’umupira w’amaguru wahuje ikipe y’abamotari bo muri zone ya Bwishyura-Mubuga, n’iya zone ya Rubengera-Birambo, Bwishyura-Mubuga batsinda 3 kuri 0 ya Rubengera-Birambo.

Umukino wabereye ku kibuga cya IPRC West (ETO Kibuye), ari naho ibindi bikorwa byabereye mu masaha y’igicamunsi, bisozwa n’ubusabane hagati y’abayobozi n’abamotari.

Gasana Marcellin