Imwe muri iyo mitungo kamere itajya ibarurirwa agaciro ni nk’ishyamba rya Gishwati rituma icyayi giteye iruhande rwacyo cyongera uburyohe ariko abantu ntibabyiteho, nk’uko Minisitiri w’Umutungo kamere (MINIRENA), Stanislas Kamanzi, yabitanzeho urugero.

Mu nama ya mbere y’akanama kashyizweho gukora ibarura ry’iyo mitungo, yabaye kuri uyu wa Kabiri tariki 15/10/2013, Minisitiri Kamanzi yatangaje ko nibamara kubarura imitungo nk’iyo itazwi aribwo bazahitamo aho bazitaho cyane bitewe n’agaciro birusha ibindi.

Yatangaje ko aka kanama kagiyeho kugira ngo kongerere agaciro ibikorwa nk’ibyo birimo amashyamba n’imigezi, nk’uko u Rwanda rwabyiyemeje guhera umwwaka ushize kugira ngo narwo rwongerere agaciro imitungo wabyo.

Abagize akanama ko kugenzura umutungo kamere w’u Rwanda.

Yagize ati: “Ubundi usanga umutungo w’igihugu ukunze kubarwa hashinigiwe ku musaruro uba wabonetse uva mu baturage n’abandi bantu bakora imirimo ijyanye n’ubukungu n’amajyambere.

Hakaba rero ubu buryo bushyashya bwaratangiye gukorwa mu bihugu binyuranye ntibyari byaba byinshi ku isi, nko muri Afurika hari bicye nka Bostwana, Madagascar byatangiye gukorerwamo.”

Minisitiri Kamanzi yakomeje avuga ko inyungu ku Rwanda ari uko ruzamenya agaciro igihugu gifite mu mafaranga, kugira ngo babishyire muri gahunda z’iterambere, gukora igenamigambi rirambye no kumenya ahagomba gushyirwa imbaraga.

Emmanuel N. Hitimana