Mu kigo cyigisha imyuga cya Mayange niho iyi miryango izaba icumbikiwe by’agateganyo. Umuganda wakozwe kuri uyu wa 03/01/2014 n’abaturage bunganiwe n’ingabo na polisi wibanze ku bikorwa by’isuku ahatemwe ibihuru dore ko iki cyigo cyigisha imyuga muri iyi minsi kitarimo gukorerwamo.

Mu birukanywe muri Tanzaniya bamaze iminsi bacumbikiwe mu nkambi ya Kiyanzi na Rukara mu ntara y’iburasirazuba , abagize imiryango 200 bavuze ko bakomoka mu Bugesera.

Abapolisi bifatanya n’abaturage gusiba ibinogo by’aho Abanyarwanda birukanwe muri Tanzaniya bazatuzwa.

Iyi miryango igomba gutuzwa nk’abandi baturage nk’uko umuyobozi w’akarere ka Bugesera, Rwagaju Louis abivuga.

Ati “bagomba kuba bashyizwe aha mu gihe cy’agateganyo cy’amezi atatu, nyuma bakazashakirwa aho gutura mu rwego rwa burundu. Turasaba abaturage bacu kubakira neza babaha ikaze kandi buri wese akabisangamo anabafasha mu buryo ashoboye”.

Dushime Grace ni umwe mu baturage b’akarere ka Bugesera avuga ko nabo biteguye kwakira abo Banyarwanda.

Yagize ati “iyirukanywa ry’Abanyarwanda muri Tanzaniya ryadusigiye isomo ko ntacyaruta igihugu cyawe aho waba uri hose. Natwe kuko ari abavandimwe bacu twiteguye kubafasha gusubira mu buzima busanzwe tubibagiza ibyababayeho ubwo birukanwaga”.

Abaturage baharura ibyatsi kandi nabo wasangaga babyishimiye.

Muri aba Banyarwanda baheruka kwirukanywa muri Tanzaniya, akarere ka Bugesera kari karakiriye abandi nk’abo bagize imiryango isaga 60 yari ifite bene wabo mu mirenge inyuranye y’aka karere.

Aba bazatangira kuza mu mpera z’iki cyumweru bo nta kanunu k’imiryango yabo yaba ikiriho gusa, ngo icyo bari barumvise n’uko bakomokaga mu Bugesera.

Egide Kayiranga