Ibi ni ibyatangajwe kuri uyu wa gatanu tariki 25/10/2013 mu nama ngishwanama ku misoro n’amahoro yahuje inzego zinyuranye harimo ubuyobozi bw’akarere, ikigo cy’igihugu cy’imisoro n’amahoro, abatsindiye amasoko yo gukusanya amahoro, abanyamabanga nshingwabikorwa b’imirenge ndetse n’ihuriro ry’abikorera.

Abarikumwe Cyprien, Umwakirizi w’imisoro mu karere ka Nyamagabe asobanura iby’iyi gahunda nshya yavuze ko mbere bakoresha abakirizi b’imisoro bahembwa na Leta ariko umusaruro ukaba utabaga mwiza nk’uko wifuzwa, iyi gahunda yo gukoresha abikorera ikaba ije gukemura iki kibazo dore ko byanatangiye kugaragara.

Ati “mu gihe tumaze imirimo iragenda neza bikaba bitanga icyizere ko amafaranga aziyongera”.

Imwe mu mpamvu ituma kwegurira abikorera kwinjiza amahoro bizatanga umusaruro ngo ni uko baba barahize amafaranga bagomba kubona bityo igihe batayagezeho bakongeraho ayabo, ndetse ngo bakaba bazajya bahembwa bitewe n’ayo binjije.

Mu rwego rwo kubagenzura kandi ngo babahaye ibitabo by’akarere birimo n’ibirango bakaba aribyo bakoresha, hakaba hagenzurwa niba ayo binjije yose bayashyize kuri konti z’akarere ndetse bakaba bazajya banagenzura niba nta manyanga bagaragaza mu kazi kabo, aho bigaragaye bagasesa amasezerano.

Bimwe mu bibazo aba batsindiye amasoko yo gukusanya amahoro bagaragaje harimo amasoko y’amatungo atazitiye ku buryo bitorohera abasoresha gusoresha buri tungo, umuyobozi w’akarere ka Nyamagabe, Mugisha Philbert akaba yabijeje ko aho bishoboka bagiye kuyazitira mu gihe bidashoboka byihutirwa bakazabitegura mu gihe kiri imbere.

Muri iyi nama kandi, abanyamabanga nshingwabikorwa b’imirenge basobanuriwe amwe mu mategeko agena imisoro ku masoko bagiye kujya batanga mu mirenge bayoboye kugira ngo hatazagira unyereza imisoro bikaba byabagiraho ingaruka.

Emmanuel Nshimiyimana