Nk’urwego rushinzwe gutangariza Abanyarwanda amakuru y’ibibera mu gihugu, abanyamakuru barakangurirwa gukomeza kurushaho gusobanukirwa imiyoborere myiza cyane cyane ku mikoreshereze y’umutungo wa Leta, nk’uko bitangazwa na Minisitiri w’Ubutegetsi bw’Igihugu, James Musoni.

Ati "Ni byiza ko itangazamakuru riba ryumva uko iyi gahunda ikorwa, uko itegurwa, uko ishyirwa mu bikorwa. Icyashimishije muri ibi biganiro ni uko abagize itangazamakuru ubona bumva neza iki gikorwa uko gitegurwa ndetse n’intambwe igihugu kimaze gutera mu kubaka neza umutungo wa Leta n’ibibazo bikigaragaramo bakaba babyumva kimwe.

Noneho n’uruhare basabwa kugira ngo bajye kwigisha Abanyarwanda akamaro k’imicungire y’umutungo cyane cyane abacungamutungo w’igihugu cyacu".

Uhereye iburyo: Obadia Biraro ushinzwe gukurikirana ikoreshwa ry’imari ya Leta, Minisitiri James Musoni na Depite Nkusi Juvenal mu kiganiro n’abanyamakuru.

Yakomeje avuga ko abanyamakuru bagomba gufatanya n’ubuyobozi mu gutahura no gushyira hanze abayobozi bagira uruhare mu makosa cyangwa inyerezwa ry’umutungo wa Leta.

Ibi yabitangarije mu biganiro byahuje abahagarariye ibitangazamakuru bikorera mu Rwanda n’urwego rushinzwe gukurikirana uko umutungo wa Leta ukoreshwa (AOG). Inama yabaye kuri uyu wa kabiri tariki 7/1/2014.

Umugenzuzi mukuru w’imari ya Leta, Obadia Biraro, yatangarije Kigali Today ko mu myaka 15 uru rwego rumaze ruriho rwifuza gukorana n’itangazamakuru cyane, kuko hari byinshi rishobora kubagezaho byerekeranye n’amakuru narwo rukabaha amakuru ku mibare rufite.

Emmanuel N. Hitimana