Abo baturage bagaragaza ingaruka n’akababaro bavuga ko babazaniye iryo vomo rusange kugirango babarinde amazi y’ikiyaga kuko aba yanduye ndetse n’uko bashobora guhuriramo n’ibibazo birimo nko kuribwa n’ingona; nk’uko bivugwa na Mukamusonera Leoncie waruvuye kuvoma mu kiyaga cya Cyohoha.

Ati “Ubu ijerekani y’amazi turimo kuyigura amafaranga 50 kuko abafite imbaraga nibo bajya kuyazana”.

Intandaro yo gufunga iryo vomero rimaze umwaka rifunze ni uko uwari ushinzwe kuricunga yatwaye amafaranga abaturage batangaga iyo bazaga kuvoma; nk’uko bisobanurwa n’Umunyamabanga nshingwabikorwa w’umurenge wa Ngeruka, Sebarundi Ephrem.

Umuyobozi w’ishami rya EWSA mu karere ka Bugesera, Rutabayiru Janvier, avuga ko atari ivomero rusange rya Shami ryafunzwe kubera kutishyura EWSA gusa ahubwo n’ahandi iyo ucuruza amazi ku ivomero rusange atishyura EWSA iryo vomero rirafungwa maze yamara kwishyura agafungurirwa.

Umuyobozi w’akarere ka Bugesera, Rwagaju Louis, arizeza abaturage bafungiwe amavomero rusange ko iki kibazo kirimo gushakirwa umuti ku buryo mu minsi yavuba ayo mavomero yafungurwa.

Ati “ubu turimo kuvugana nabo nibinanirana turimo kureba uburyo twabashyikiriza inkiko ndetse habeho no gufatira imitungo yabo, nibigaragara ko byananiranye kwishyura”.

Ku mavomero rusange abaturage bavomera ku mafaranga 10 ku ijerekani mu gihe iyo bayavomye ku baturage bayifitiye ku giti cyabo bishyura hejuru y’amafaranga 50, n’ubwo EWSA ivuga ko nabyo biba bitemewe kugurisha amazi kuri icyo giciro.

Egide Kayiranga