Mu bikorwa RDB izereka abo bashoramari baturutse hirya no hino ku isi, harimo ishusho y’aho igihugu kigeze mu iterambere ry’ubukerarugendo, ikoranabuhanga, servisi z’imari, gutwara abantu n’ibintu, ndetse n’ubuzima; nk’uko Hubert Ruzibiza uhagarariye iterambere rya servisi muri RDB yasobanuye.

Ati “Iyi nama ni iyo gufasha abikorera kugaragaza uruhare rwabo mu iterambere rya servisi no guhindura u Rwanda ihuriro ry’imari mu karere ruherereyemo, kugirango buri muturage azabe abasha kubona umusaruro w’idolari 1.240 ku munsi, hamwe n’ubukungu bw’igihugu buzaba bwiyongeraho 11.5% mu mwaka wa 2017”.

Ushinzwe guteza imbere servisi muri RDB asobanura icyakorwa kugira ngo ibigo bimwe na bimwe bikosore imikorere mibi; yavuze ko mu Rwanda hakiri abakozi b’abanyamahanga baje kubera urugero abenegihugu, ndetse ko hari za kampanyi n’amahugurwa binyuranye bikomeje kubera mu gihugu.

Raporo ya RDB yo mu mwaka wa 2009 ku itangwa rya servisi, yagaragaje ko u Rwanda rwahombye miliyoni 40 z’amadolari y’amerika muri uwo mwaka, kubera gutanga nabi servisi mu nzego zitandukanye.

“Muri icyo gihe gutanga servisi zinoze byari byishimiwe ku gipimo cya 60%, ubu bikaba bigeze kuri 71%, ariko intego ikaba ari uko mu mwaka wa 2017 icyo gipimo cyazaba kirenga 80%”, nk’uko Yves Ngenzi ushinzwe ibyo kwita ku bakiriya muri RDB yasobanuye.

Inama mpuzamahanga iteganijwe mu cyumweru gitaha, izahuza abashoramari n’impuguke mu bya servisi batavuzwe umubare, ariko bakazaba baturutse mu bihugu bitandukanye byo ku isi harimo Ubwongereza, Leta Zunze Ubumwe za Amerika, Ubuholandi, Canada, Ubuhinde na Nigeria.

Simon Kamuzinzi