Umujyi wa Butare uri mu mijyi imaze igihe kinini mu Rwanda kandi ukaba n’umujyi ufite amateka akomeye mu Rwanda. Uyu mujyi benshi bakunze kuvuga ko ari umujyi udakunze guhindura isura yahoranye kuko ukigaragaramo inyubako zo ku ngoma ya gikoroni.

Aha Umuyobozi w’aka karere Eugene Kayiranga Muzuka avuga ko abibwira ko uyu mujyi utajya uzamuka ugereranije n’indi yo mu Rwanda bibeshya kuko uyu mujyi ufite uduce turi kuzamurwamo inyubako.

Agira ati: “umujyi wacu ni munini, ntabwo abubaka bubaka ku muhanda mugari gusa ahubwo hari uduce nko ku i Taba, Karubanda n’ahandi hazamuwe inyubako zigezweho kandi nyinshi”.

Ariko Mayor Muzuka avuga ko uyu mujyi ukirangwamo inzu nyinshi za kera zitajyanye n’igihe, bakaba baratangiye gahunda yo kuzisenya hakubakwa izindi.
Bamwe muri ba nyiri inyubako banyuranye muri uyu mujyi batangiye kuvugurura inyubako zabo. Nyamara izitari nke usanga zisenywa zikamara igihe kitari gito zitarubakwa.

Aha Mayor Muzuka akaba avuga ko icyateye ibi byose ari imyiteguro ibanza gukorwa, ati: “ba nyiri inyubako babanje gushaka inguzanyo kugirango bazabashe kubaka amazu agezweho”.

Ku bufatanye n’abikorera, hazubakwa inyubako 7 z’amagorofa y’ubucuruzi kugera ubu ziri byibuze kuri 30%: BNR, Hotel Ibis, Hotel Faucon, Semuhungu, Misago Aphrodis, ECOBANK, Igiti cy’ubugingo.

Zimwe muri izo nyubako zagaragarijwe ibishushanyo mbonera, ziteganijwe kuba zarangiye kubakwa mu kwezi kwa karindwi k’umwaka wa 2012.

Gerard GITOLI Mbabazi