“U Rwanda ruri mu bihugu bya mbere ku isi byorohereza ishoramari; icyo si ikintu cyoroshye; niyo mpamvu twishimiye kuza kuhakorera; twaherekeje abakiriya bacu, cyane cyane abo muri Kenya nka Nakumatt, Equity Bank n’abandi dusanze hano”, nk’uko Umuyobozi wa Deloitte muri Afurika y’uburasirazuba, Sammy Onyango yatangaje.
Onyango avuga ko iyo ubukungu bw’igihugu nk’u Rwanda buzamuka, bituma n’abandi bashoramari bakomeza kuza, ashingiye kukuba ngo ‘ibintu bijya aho ibindi biri’.

Abayobozi ba Deloitte bavuze ko ubujyanama n’ibisubizo by’ibibazo abantu bafite icyo kigo gitanga, bizafasha abakiriya bacyo kwishyura neza imisoro muri Leta, ndetse no guhindura imikorere yatuma nta kigo cyangwa umuntu ku giti cye ushobora gukorera mu gihombo.

Ikirango cy’ikigo cya Deloitte.

Iki kigo cyatangiye gukorera mu Rwanda ku itariki 21/2/2014, ngo kizahindura imikorere mu bijyanye no guteza imbere ubwishingizi, ubugenzuzi ku mikorere y’abantu cyangwa ibigo, inama zirebana n’ubwiyongere bw’imari, izatuma habaho gutanga imisoro neza, hamwe no guteganya cyangwa kwirinda ingaruka zishobora guteza igihombo ku mushoramari.

Deloitte ngo irashaka kureba imirimo ikorerwa muri zone y’inganda yitwa ‘Special economic zone’ i Nyandungu, ikajya inama yo kongera umubare w’ibyoherezwa mu mahanga birenze ikawa n’icyayi.
“Turibaza tuti ‘ese kuki tutashaka n’uburyo igihingwa cy’ibitoki cyajya ku kigero kimwe n’ikawa hamwe n’icyayi!’ Onyango.

Mubyo abakozi ba Deloitte bavuga ko bazateza imbere harimo ubukerarugendo, kunoza serivisi, iterambere ry’imijyi, ikoranabuhanga no kwirinda ingaruka z’ihungabana ry’umutekano zirishingiyeho, ubuhinzi butanga umusaruro; aho ngo ubujyanama buzatangwa ku bantu cyangwa ibigo, ku giciro kijyanye n’amikoro ya buri wese.

Umuyobozi wa Deloitte ku rwego rw’Afurika y’uburasirazuba no hagati, atangiza icyo kigo mu Rwanda.

Deloitte ngo ntije gusimbura inzego z’igihugu zishinzwe kongerera ubushobozi abakozi, ahubwo ngo izakorana nazo mu kubona abarimu bahugura abo bakozi, nk’uko byasobanuwe n’uyihagarariye mu Rwanda, Norbert Kagoro.

Ikigo cya Deloitte gifite icyicaro mu Bwongereza, kivuga ko gikorera mu bihugu birenga 150 ku isi hose, kikagira abakozi 200,000 b’impuguke mu bintu binyuranye. Mu bihugu cyatangiye gukoreramo kuva kera, ngo imikorere na gahunda za Leta nyinshi byatanzwe nacyo.

Ngo cyaje gikurikiye ubwiyongere bw’ishoramari mu Rwanda, ndetse n’isura nziza kuri rwo mu bijyanye n’ishoramari; aho raporo ya Banki y’isi y’umwaka ushize wa 2013, ishyira u Rwanda ku mwanya wa 32 ku isi (ruvuye ku wa 54 mu mwaka wawubanjirije), mu bihugu bizoroha gushoramo imari mu mwaka wa 2014.

Simon Kamuzinzi