Uyu musore ucururiza isombe mu isoko rya Ruhango avuga ko amaze imyaka itatu agakora uyu murimo, gusa akababazwa n’abantu cyane cyane urubyiruko usanga bamuseka bavuga ko batakora akazi nk’ake ko gucuruza isombe. Kuri we ibi ngo ntacyo bimubwiye kuko azi akamaro bimufitiye.

Ati “usanga bavuga ko gucuruza isombe ari iby’abagore, ariko jye ibyo ntacyo bimbwiye kuko kuri ubu umwuga ni utunze umuntu”.

Nsabimana akora akazi ko gucuruza isombe mu isoko.

Uyu musore ngo ababazwa cyane n’urubyiruko usanga ruzindukira ku muhanda rwashyize amaboko mu mifuka rutegereje kwambura abavuye kwishakashakira imibereho babikuye mu maboko yabo ndetse n’ibitekerezo.

Atangira akazi ke yatangiranye akamashini gasya isombe yaguze amafaranga y’u Rwanda ibihumbi 30, kubera umuhate no gukunda akazi akora, yateye imbere noneho agura indi mashini y’amafaranga ibihumbi 200 ikoreshwa n’amashanyarazi.

Aka gashya yazanye ko gukoresha imashini y’umuriro, ngo byatumye abakiriya bamugana ari benshi ndetse akazi ke karusho kwihuta.

Nsabimana asaba urubyiruko kudasuzugura akazi ako ariko kose.

Nsabimana agira urundi rubyiruko inama yo kudasuzugura akazi kose kuko icya mbere ari ukuba gatunze ugakora. Ubu ngo afite intego y’uko mu mwaka utaha azagura imashini zigera kuri eshanu, akazikwirakwiza mu dusantere dutandukanye agashaka abandi bantu aha akazi.

Uretse kuba uyu mwuga Nsabimana akora umutunze, ngo unafitiye abandi akamaro kuko hari abahinzi aha isoko ryo kumuhingira isombe yakwera bakamuzanira umusaruro akabishyura nabo bakabasha kwiteza imbere.

Aka kazi benshi basa nk’aho basuzugura, Nsabimana kamwinjiriza amafaranga ibihumbi 3 buri munsi, akarya 1000 akabika ibihumbi 2.

Ubwo Kigali Today yasuraga Nsabimana aho akorera akazi ke, yahansanze umurongo w’abantu baje guhaha isombe bavuga ko iyo bagura ku cyuma gikoreshwa n’umuriro itandukanye niyo bajyaga bagura isekuwe mu isekuru.

Iyi sombe ngo iryoha kuruta iyasekuwe mu isekuru isanzwe.

Nisingizwe Bérnadette, avuga ko we n’umuryango we bakunda isombe cyane. Akomeza avuga ko ari isnhuro ya kabiri ahaha isombe yasekuwe mu buryo bw’ikoranabuhanga ariko ngo yasanze hari itandukaniro niyo yajyaga ahaha yo mu isekuru, kuko ngo iyi ikorerwa mu byuma by’ikoranabuhanga usanga iba inavanzemo ibirungo bitandukanye ukagenda uteka gusa.

Eric Muvara