Bimwe mu bibazo minisitiri yegejejweho ni imikoranire itari myiza hagati y’abahinzi b’imyumbati n’uruganda rwa Kinazi ahanini iterwa n’ubwumvikane buke bushingiye ku giciro. Kuko uruganda ruha umuhinzi amafaranga 55 mu gihe umuhinzi we nibura yumva yahabwa amafaranga 100.

Iki kibazo rero gituma uruganda rutabona umusaruro uhagije, kuko abahinzi batemera kuwurekura ahubwo bagahitamo kwiyinikira bakayigurisha yumye. Aha minisitiri akaba ariho yahereye agira inama ubuyobozi bw’uru ruganda kumanuka rukegera abahinzi bakumvira hamwe ikibazo.

Minisiti Kanimba Francois yasabye ubuyobozi bw’uruganda rw’imyumbati kwicarana n’abahinzi bagakemura ibibazo biri hagati yabo.

Yagize ati “murabizi neza uru ruganda Leta yarutanzeho amafaranga menshi, kandi turabizi neza ko imyumbati itabuze, ahubwo icyibura ni imikoranire myiza hagati y’impande zombi. Gusa impande zose twagerageje kuganira, haba uruhande rw’abahinzi, ubuyobozi bw’uruganda ndetse n’ubw’akarere. Turizera ko inama twabahaye hari icyo ziri butange kugirango uruganda rutangire rubone umusaruro uhagije”.

Ageze ku ruganda rw’umuceri, minisitiri Kanimba yasobanuriwe imikoranire y’uru ruganda ndetse n’abahinzi b’umuceri. Akaba yanyuzwe n’ibisobanuro yahawe birimo kuba ubu abahinzi bafite imigabane mu ruganda, kuba ubuyobozi bw’uruganda bumanuka bagafasha abahinzi kurebera hamwe ibibazo bihari kugirango bishakirwe umuti, ibi bikaba byaratumye umusaruro w’uruganda wiyongera.

Minisitiri Kanimba yishimiye ibikorwa by’uruganda rutunganya umuceri rwa Gafunzo Rice Mill.

Aha minisitiri Kanimba yasabye ko n’izindi nganda zikwiye gufatira urugero kuri uru ruganda rwa Gafunzo Rice Mill, uko rukorana n’abahinzi mu guteza imbere umusaruro wabo.

Minisitiri Kanimba kandi yaboneyeho umwanya wo kwihanangiriza abantu bagikoresha utumashini tutemewe dutonora nabi umuceri tukawangiza, bigatuma bidindiza iterambere ry’abahinzi ndetse n’iry’igihugu.

Eric Muvara