Ibiciro bya gazi mu Rwanda bikomeje kutavugwaho rumwe

Kugeza ubu ikilo kimwe cya gazi mu Rwanda kiragura hagati y’amafaranga igihumbi n’igihumbi na magana ane (1000frw-1400frw),bitewe n’aho icururizwa. Mu myaka ibiri ishize igiciro cya gazi cyazamutseho hagati ya 200Frw na 800Frw.

Gazi ikigera mu Rwanda bwa mbere yatangiye iri ku 1.800Frw ku kilo ariko iza kongera kugenda izamuka.

Bamwe mu baturage batangiye kwemeza ko kuzamuka kw’ibiciro bya gazi bigenda bibaca intege kuko bidahura n’ubushobozi bwabo, nk’uko umuturage witwa Olive Umurerwa utuye mu Karere ka Kicukiro abitangaza.

Agira ati “Gazi ni yo nziza ugereranije n’amakara ariko se ukibaza uti ni abantu bangahe bashobora kugira ubushobozi buhwanye n’iryo zamuka ry’ibiciro rya hato na hato.”

Umurerwa akoresha ibilo 15 bya gazi mu byumweru bitatu,bitewe n’uko guteka byagiye bikorwa mu rugo.

Ababikurikiranira hafi bemeza ko izamuka ry’ibiciro rya hato na hato riterwa n’uko isoko ryihariwe na bamwe bigatuma ari na bo bashyiraho ibiciro bishakiye.

Umwaka ushize warangiye mu Rwanda hinjiye ibilo bya gazi bigera kuri miliyoni 10. Iyo gazi yose yinjijwe n’amasosiyete atanu gusa yemerewe kuyicuruza mu Rwanda.

Izo sosiyete ni SafeGas, Lake Gas, Kobil, Societe Petroliere Ltd (SP) na Merez. Abo bacuruzi bibumbiye mu ishyirahamwe.

Kugira ngo umuntu yemererwe kwinjira muri iryo shyirahamwe,ashobore kuyicuruza ni uko agomba kuba afite ubushobozi bwo gutumiza nibura ibilo bya gazi bigera ku bihumbi 100.

Abaturage benshi bemeza ko ibiciro bya gazi bigenda birenga ubushobozi bwabo

Umwe mu bashinzwe ubucuruzi kuri Sitasiyo ya Kobil, na we yemereye Kigali Today ko ibiciro byabo biri hejuru cyane.

Yagize ati “Ikilo kimwe cya gazi cyakabaye kiri kuri 600Frw nibura ku mucuruzi wa nyuma. Iyo urebye ayo umucuruzi yayiranguyeho ku cyambu cya Dar es Salaam angana na 210Frw, ukongeraho ay’urugendo ayitangaho ayizana, ubundi ntiyakabaye irenza 600Frw ku kilo ku mucuruzi wa nyuma.”

Kuri we asanga izamuka ry’ibiciro nta kindi kiryihishe inyuma uretse kuba isoko ridafunguye. Ati “Abo bacuruzi ni bo bicara bagashyiraho ibiciro bagendeye ku bintu bitandukanye na bo babona bishobora kubahombya. Ariko nanjye nemera ko ibiciro biri hejuru.”

Mu mafaranga abatumiza gazi bacibwa, harimo agera ku 183Frw ku kilo bacibwa n’ikigega cy’igihugu gishinzwe kubungabunga imihanda. Gazi nyinshi ikoreshwa mu Rwanda ituruka mu Busuwisi.

Ikigo cy’igihugu gishinzwe imirimo ifitiye igihugu akamaro (RURA) na cyo cyemeza ko ibiciro bya gazi bidakanganye ugereranije n’ibyo mu bihugu bituranye n’u Rwanda, nk’uko Gérard Rusine ushinzwe imicungire y’ubucuruzi bwa gazi muri RURA abivuga.

Ati “Urebye mu bindi bihugu nka Kenya na Tanzania,ibiciro byacu biracyari hasi.”

Eng. Rusine yongeraho ko ariko RURA yashyizeho igitabo gikubiyemo ibiciro by’uduce twose two mu gihugu, kizajya kifashishwa mu gihugu cyose.

Ati “Ntabwo tugenzura ibiciro bya gazi nk’uko tubikora kuri essence ariko guhera muri Mutarama 2018,twashyizeho amabwiriza azorohereza abantu benshi kubona ibyangombwa bibafasha kwinjira mu bucuruzi bwa gazi.”

Abanyarwanda bagera 83% baracyakoresha amakara n’inkwi, ibintu bifatwa nk’ibyangiza ikirere. Ubushakashatsi bw’Ikigo cy’Igihugu gishinzwe ibidukikije (REMA) bugaragaza ko inkwi n’amakara biri mu bihumanya ikirere cy’u Rwanda ku kigero cyo hejuru.

MENYA UMWANDITSI

KT Editorial

Abanyamakuru ba Kigali Today

@ kigalitoday

Reba inkuru zose nanditse ( 2941 )