Ku wa gatatu tariki 13/03/2013, habaye inama yahuje inzego zitandukanye ndetse n’abahagarariye abaturage ngo bagezweho ibibakorerwa banarebere hamwe uko akarere kabo gahagaze mu gushyira mu bikorwa imihigo.

Ntawurishira Hilalie uhagarariye plate forme ya sosiyete sivile mu karere ka Nyamagabe yagize ati: “iyi nama twayitumiye dufite intego ebyiri.

Kuyihuza n’ukwezi kw’imiyoborere myiza dusobanurira abaturage ibibakorerwa, ndetse no kurebera hamwe aho tugeze twesa imihigo y’umwaka wa 2012-2013 kugira ngo abaturage babone aho bahera bongeramo ingufu tugere mu gusoza umwaka w’imihigo twayesheje 100%”.

Ntawurishira akomeza avuga ko basanze mu mihigo myinshi cyane cyane ijyanye n’ubukungu –dore ko ariyo iba ari myinshi- bageze hejuru ya 70%, bikaba byerekana ko nibarushaho gufatanya bazasoza umwaka w’ingengo y’imari barabigezeho uko bikwiriye.

“abaturage nibafatanya n’ubuyobozi ndetse n’abafatanyabikorwa harimo na sosiyete civile turi bwongeremo imbaraga bikazagera mu kwezi kwa gatandatu imihigo yeshejwe ku buryo bukwiriye,” Ntawurishira.

Nk’uko byagaragaye muri iyi nama, ngo hakenewe kongera ingufu mu gukora ubukangurambaga kugira ngo abaturage babashe kurushaho kwitabira ibikorwa basabwa kugiramo uruhare, nko gutanga umusanzu w’ubwisungane mu kwivuza, kubaka inyubako zizakorerwamo n’utugari n’ibindi.

Abagize sosiyete sivile cyane cyane abanyamadini basabwe gufasha mu gukora ubukangurambaga mu baturage, kugira ngo bitabire gahunda za Leta zitandukanye zigamije iterambere n’imibereho myiza yabo.

Bibukijwe ko mu gihe akarere kadahagaze neza mu mihigo bitabazwa umuyobozi wako gusa, ahubwo abaturage bose ndetse n’abafatanyabikorwa bagakoreramo baba barabigizemo uruhare.

Emmanuel Nshimiyimana