Mu muganda udasanzwe wabaye tariki 08/06/2013 wo gutegura aho abavanywe muri zone y’ibiza bazatuzwa, umuyobozi w’Akarere ka Ngoma, Nambaje Aphrodise, yibukije akamaro ko gutura mu midugugu, avuga ko iyo abaturage bari hamwe byorohereza Leta gutanga ubutumwa buganisha ku iterambere no ku buzima bwiza.

Yagize ati “Iyo abantu bari hamwe bigira ku bandi bakigiramo umuco wo gufatanya, umuco wo kubana, kumenyera kubana, ariko by’umwihariko noneho byorohereza na Leta kubarindira umutekano no kubagezaho ibikorwa rememezo.”

Nkuranyabahizi Emile yabajije ikibazo avuga ko nubwo icyo kibanza kizubakirwaho aba hantu byavuzwe ko ari icya Leta we yemeje ko ibyo bibanza biri mu isambu ye bwite.

Ibi byatumye hashyirwaho itsinda ry’impuguke zizakurikirana iki kibazo hakurikijwe amategeko agenga ubutaka, uyu Nkuranyabahizi yaba ari mu kuri akazahabwa ingurane y’amafaranga cyangwa ubundi butaka, nk’uko byashimangiwe n’umuyobozi w’akarere ka Ngoma.

Nyuma y’uyu muganda hasuwe kandi inyubako y’ikigo nderabuzima cya Gahurire ndetse n’ibiro by’akagari k’Umukamba. Bikaba biteganyijwe ko izo nyubako zombi zizatahwa mu minsi ya vuba zimaze kuzura.

Jean Claude Gakwaya