Ibi byatangajrijwe mu rugendo rw’isuzuma rwakozwe n’umuyobozi w’umujyi wa Kigali, Fidele Ndayisaba, kuri uyu wa Kabiri tariki 23/07/2013, aho yarebaga uko ibikorwa aka karere kari kiyemeje bigeze mu gihe hasigaye iminsi micye igenzura ry’imihigo rigakorwa.

Ubuyobozi bw’iyi mirenge bwemeza ko ibi bikorwa hari icyo bizatanga ku bukungu, kuko uretse no gukemura ikibazo cy’aho abantu bacururiza, bizanafasha mu guhanga imirimo mu karere ka Gasabo.

Umuyobozi w’umujyi wa Kigali yasuye koperative OPCOM agaragarizwa igishushanyo mbonera cy’imyubako bateganya kubaka.

Ibyo bice ngo bizafasha abahaha kubona ibyo bifuza byose batiriwe bazenguruka henshi bityo byinjirize abaturage n’igihugu muri rusange, nk’uko Willy Ndizeye, umuyobozi w’akarere ka Gasabo yabitangaje.

Yagize ati: “Icyizere kirahari kuko izi nyubako zose ni iz’ubucuruzi kandi abantu bacuruza ibintu byinshi ku buryo twizera ko buri muntu wese uzajya uza hano azajya ahava ahakuye icyo yashakaga cyose.”

Umuyobozi w’umujyi wa Kigali we yatangaje ko yishimiye izi nyubako uburyo zubakwa n’Abanyarwanda kandi bagaha akazi Abanyarwanda. Akanemeza ko mu myaka ibiri iza izi nyubako zizaba zatangiye kubyara umusaruro.

Mu murenge wa Ndera naho baritegura kuzamura imiturirwa.

Akarere ka Gasabo kizeye kuzahigana mu mihigo y’uyu mwaka, nyuma y’uko umwaka ushizwe wa 2012/2013 kari kaje ku mwanya wa nyuma.

Emmanuel N. Hitimana