Muri iri tangira ry’igihembwe cy’ihinga B cy’umwaka wa 2016, Ministiri w’ubuhinzi n’ubworozi, Dr Gerardine Mukeshimana, asaba abahinzi kwirengagiza amakuru avuga ko ifumbire yangiza ibinyabuzima.

Imyaka idafumbiwe neza ntitanga umusaruro uhagije.

Agira ati “Iyo turebye ubwiyongere bw’abaturage n’ubw’umusaruro uko bumeze, ubona ntaho turageza mu rwego rwo gukoresha amafumbire. Abavuga ko yangiza udukoko sibyo, ahubwo wenda umuntu yavuga ibyo kwangiza amazi cyangwa ibindi.”

Ministiri Mukeshimana avuga ko Leta yunganira abahinzi ikabaha ifumbire kugera kuri 50%, ariko ikibazo kikaba ko batayigura mu buryo buhagije. Asaba inzego kutavuga nabi ifumbire mvaruganda mu baturage.

Ati “Turi ku rugero rwo gukoresha ibiro 32 by’ifumbire mvaruganda kuri hegitare imwe (32kg/ha), n’ubwo umugabane wa Afurika muri rusange ukiri hasi y’urwo rugero.

Aziya iri ku rugero rwo gukoresha ibiro 95 kuri hegitari, Amerika n’u Burayi bageze ku gukoresha ibiro 250kg/ha by’ifumbire mvaruganda.”

Ministiri Mukeshimana avuga ko atangazwa no kubona umuntu ahinga imirambi minini bakayiteraho imyaka ariko ibyo yahinze ukabona ari umuhondo, imbaraga uwo muhinzi aba yarakoresheje atari zo yiteze kuzakuramo mu gihe atakoresheje inyongeramusaruro.

MINAGRI igira inama abahinzi yo kuvanga ifumbire mvaruganda n’imborera kuko ngo zombi zifite akamaro kihariye, aho imborera ngo igira ibyiza byo kuryoshya ubutaka, mu gihe ifumbire mvaruganda ngo ibushyiramo imyunyu ngugu itari mu ifumbire y’imborera.

MENYA UMWANDITSI

Simon Kamuzinzi

Umunyamakuru

@SimonKamuzinzi

Reba inkuru zose nanditse ( 2479 )